ا ق ش تۇرعىندارى اراسىندا زاڭسىز قارۋعا سۇرانىس ارتتى
قازىرگى ۋاقىتتا حالىق قولىندا ءتۇرلى قارۋدىڭ 500 ميلليون بىرلىگى بار. ولاردىڭ سانى جىل سايىن تاعى 18-20 ميلليونعا ارتىپ وتىرادى. ا ق ش تۇرعىندارى قارۋ- جاراقتى، سونىڭ ىشىندە تىركەلمەگەن قارۋدى كوپتەپ ساتىپ الىپ جاتىر.
الكوگول، شىلىم، قارۋ- جاراق جانە جارىلعىش زاتتار جونىندەگى بيۋرو مالىمەتىنشە، 2020 -جىلى امەريكانىڭ قارۋ وندىرۋشىلەرى 11,3 ميلليون اتىس قۇرالىن شىعارعان. بۇل 20 جىل بۇرىنعى كورسەتكىش - 3,9 ميلليون بىرلىكتەن ءۇش ەسەگە كوپ.
قۇقىق قورعاۋ ورگاندارى دا ونلاين تاپسىرىس بەرۋگە بولاتىن تىركەلمەگەن قارۋعا دەگەن ۇلكەن سۇرانىسقا الاڭداۋشىلىق ءبىلدىرىپ وتىر. بۇل رەتتە، ساتىپ الۋشىنىڭ بيوگرافيالىق دەرەكتەرى ەش تەكسەرىلمەيدى.
بۇل قىزىعۋشىلىقتىڭ ارتۋ سەبەبى، بيىلعى تامىز ايىنان باستاپ وندىرۋشىلەر قولدان جاسالعان پوليمەرلى پيستولەتتەرگە سەريالىق نومەر سوعۋعا مىندەتتەلەدى. قازىرگى ۋاقىتتا اتىس قارۋىنىڭ اتالعان ۇلگىسىندە تىركەۋ مالىمەتتەرى جوق. ال بۇل قىلمىس جاسالعاننان كەيىن تەرگەۋدى قيىنداتادى. بيىل نيۋ- يوركتە بىلتىرعى جىلمەن سالىستىرعاندا تىركەلمەگەن قارۋدى تاركىلەۋ كورسكەتكىشى 300 پايىزدان استامعا ۇلعايدى.
ەسكە سالايىق، جۋىردا ۆيسكونسين شتاتىنىڭ راسين قالاسىندا زيرات باسىنا جينالعان ءبىر توپ ادامعا قارسى وق اتىلعان بولاتىن. سونداي-اق وكلاحوما شتاتىنىڭ تالسا قالاسىندا اۋرۋحاناداعى اتىستان بەس ادام قازا تاپقان ەدى. ال ۇلتتىق مەرەكە كۇنى ا ق ش-تا جاپپاي اتىستىڭ 14 وقيعاسى بولىپ، كوپتەگەن ادام اجال قۇشتى.
مامىر ايىنىڭ سوڭىندا تەحاس شتاتىنىڭ روببا قالاسىنداعى باستاۋىش مەكتەپتە اتىس سالدارىنان 19 بالا مەن 2 ەرەسەك ادام مەرت بولدى.
اۆتور: ميرا تولەندى قىزى
