الماتىدا كوپقاباتتى ۇيلەر مەن بالاباقشا ماڭىندا جىلان ءورىپ ءجۇر

الماتى. قازاقپارات - الماتىدا كوپقاباتتى ۇيلەردىڭ كىرەبەرىسى مەن جەرتولەسىندە، قالىڭ ءشوپ اراسىندا جىلاندار ءجيى پايدا بولا باستادى، دەپ حابارلايدى قازاقپارات ءتىلشىسى.

قالا تۇرعىندارى ۇيلەردىڭ اراسىندا ءورىپ جۇرگەن جىلانداردىڭ ۆيدەوسىن الەۋمەتتىك جەلىدە تاراتىپ جاتىر.

«مەن ءبىزدىڭ اۋداندا جىلاندى ءجيى كورەم. ولار كوپقاباتتى ۇيلەردىڭ ماڭىندا جۇرەدى. ءبىز قالانىڭ شەتىندە تۇرامىز. اينالامىزدا بوس جاتقان جەر كوپ. مۇمكىن سول جاقتان كەلەتىن شىعار. بالام باراتىن بالاباقشادا دا جىلاندار شىعىپتى دەپ ەستىدىم. بالالارىمىزدىڭ قاۋىپسىزدىگىنە الاڭداي باستادىق»، - دەدى قازاقپارات تىلشىسىنە الماتىداعى «زەردەلى» شاعىناۋدانىنىڭ تۇرعىنى ايگەرىم ابدان.

بۇل اقپاراتتى الاتاۋ اۋدانىندا ورنالاسقان №148 بوبەكجاي- بالاباقشانىڭ مەڭگەرۋشىسى رايا شاراپيەۆا دا راستاپ وتىر. ونىڭ ايتۋىنشا، بالاباقشا اۋماعىندا ناۋرىز ايىندا جىلانعا قارسى دەزينفەكتسيا جۇرگىزىلگەن. كەلەسى كەزەڭ شىلدە ايىنا جوسپارلانىپ وتىر.

«قالا ىشىندە جىلانداردىڭ پايدا بولۋى - جاز مەزگىلىندەگى ەڭ وزەكتى ماسەلەنىڭ ءبىرى. ولاردىڭ اۋداندا عانا كورىنبەي، بالاباقشا اۋماعىنا دا كىرگەنى ءبىزدى الاڭداتتى. باقىتىمىزعا وراي، جىلان ەشكىمدى شاققان جوق. ءبىز ءۇشىن بالالاردىڭ قاۋىپسىزدىگىن قامتاماسىز ەتۋ ماڭىزدى. تاربيەشىلەرمەن بىرگە كۇندەلىكتى ءتۇسىندىرۋ جۇمىسىن جۇرگىزەمىز. بالالاردى دالاعا شىعارماس بۇرىن، ويىن الاڭدارىن تەكسەرەمىز. ءار توپتىڭ تاربيەشىسى بالالاردىڭ جانىندا، كوزدەن تاسا قىلمايدى. سونداي- اق اتا- انالاردان سەرۋەن كەزىندە بالالارىن ويىن الاڭدارىندا جالعىز قالدىرماۋىن سۇرايمىز»، - دەدى رايا شاراپيەۆا.

زوولوگيا ينستيتۋتىنىڭ گەرپەتولوگ مامانى يۋليا زيما قالا ىشىندە جىلانداردىڭ نەلىكتەن كوبەيىپ كەتكەنىن ءتۇسىندىردى.

«قالا قارقىندى دامىپ كەلەدى، جىلاندار مەكەندەگەن دالالاردىڭ ورنىندا جاڭا شاعىناۋداندار پايدا بولىپ جاتىر. جەردى يگەرگەننەن كەيىنگى العاشقى جىلداردا دا جىلان شىعادى، ءبىراق بىرتە- بىرتە جوعالىپ كەتەدى»، - دەيدى مامان.

ونىڭ ايتۋىنشا، الماتى قالاسىنىڭ ماڭىندا ۋلى جىلاننىڭ ەكى ءتۇرى عانا مەكەندەيدى. ولار - دالا جىلانى مەن كادىمگى قالقانتۇمسىق جىلان.

«مەگاپوليستە ادامدار كوبىنە ورنەكتى جانە سۋ جىلانىن كەزدەستىرەدى. ولار قاۋىپتى ەمەس. شاعىپ السا دا، تەز جازىلىپ كەتەدى. دەسەك تە، ساقتىق شارالارىن ساقتاعان ءجون. ەگەر جىلان شاعىپ السا، مىندەتتى تۇردە دارىگەرگە جۇگىنۋ كەرەك»، - دەدى ول.