شىلدەدەن باستاپ ۋچاسكەلىك پوليتسيانىڭ وكىلەتتىكتەرى كەڭەيەدى

نۇر-سۇلتان. قازاقپارات - شىلدە ايىنان باستاپ ۋچاسكەلىك پوليتسيا قىزمەتكەرىنە جەكە جانە زاڭدى تۇلعالارعا قۇقىق بۇزۋشىلىق جاساۋعا ىقپال ەتەتىن سەبەپتەر مەن جاعدايلاردى جويۋ تۋرالى ۇسىنىس ەنگىزۋ جانە ونىڭ ورىندالۋىن تالاپ ەتۋ قۇقىعى بەرىلەدى، دەپ حابارلايدى قازاقپارات.

بۇل تۋرالى نۇر-سۇلتان قالالىق پوليتسيا دەپارتامەنتىنەن مالىمدەدى.

سونىمەن قاتار، كامەلەتكە تولماعانداردىڭ تۇنگى ۋاقىتتا ويىن-ساۋىق مەكەمەلەرىندە بولعانى، تەمەكى ونىمدەرىن پايدالانعانى، اكىمشىلىك قاداعالاۋدى بۇزعانى جانە كولىك قۇرالدارىنىڭ قوزعالىسىنا كەدەرگى كەلتىرگەنى ءۇشىن اكىمشىلىك جازا قولدانۋ جونىندەگى وكىلەتتىكتەرى كەڭەيدى.

«بۇل ۋچاسكەلىك ينسپەكتورعا ءوز ۋچاسكەسىندە كوبىرەك بولۋعا جانە تۇرعىندارمەن الاڭسىز جۇمىس ىستەۋگە مۇمكىندىك بەرەدى. ۋچاسكەلىك ينسپەكتوردىڭ جۇمىسىنا پ ي ك، ج ي ب، جۇرتشىلىق وكىلدەرىن پروفيلاكتيكاعا تارتۋ، سونداي-اق تۇرعىندارمەن الەۋمەتتىك جەلىلەردە توپتار قۇرۋ ۇلكەن دەمەۋ بولدى، سونىڭ ارقاسىندا ازاماتتار ءوز پوليتسەيلەرىن تاني باستادى»، - دەلىنگەن ۆەدومستۆونىڭ حابارلاماسىندا.

وندا جازىلعانداي، ەسىل اۋدانىنىڭ ۋچاسكەلىك پوليتسيا ينسپەكتورلارى جالپى 671 توپقا تىركەلگەن.

ونىڭ ىشىندە جەكە سەكتورداعى ۇيلەردە تۇراتىن 83 مىڭنان استام ازامات تىركەلگەن 24 توپ بار. WhatsApp مەسسەندجەرى ارقىلى قۇقىق بۇزۋشىلىقتاردىڭ، بوتەننىڭ مۇلكىن ۇرلاۋدىڭ، سونداي-اق ينتەرنەت الاياقتىقتىڭ الدىن الۋ بويىنشا اقپاراتتار تۇراقتى نەگىزدە ورنالاستىرىلادى.

«بيىلدىققا توپتارداعى تۇرعىنداردان 482 حابارلاما ءتۇستى. ازاماتتار كوبىنەسە تىنىشتىقتى بۇزۋ، قوعامدىق ورىنداردىڭ لاستانۋى، يتتەردى سەرۋەندەتۋ جانە كولىك قۇرالدارىن قويۋ ەرەجەلەرىن بۇزۋ ماسەلەلەرىمەن شاعىمدانادى. ۋچاسكەلىك ينسپەكتورلارعا جەدەل جانە ۋاقىتىلى كومەك كورسەتكەنى ءۇشىن العىس ايتاتىن تۇرعىندار مەن قوناقتار دا كوپ. ينستاگرام جەلىسىندەگى @police_esil_nur_sultan پاراقشاسىنا جىل باسىنان بەرى حالىقتان 300 دەن استام العىس جازىلعان»، - دەپ مالىمدەدى دەپارتامەنتتەن.