جاڭا زاڭ جوباسى جاپپاي ەرەۋىل كەزىندە اسكەردى پايدالانۋعا مۇمكىندىك بەرەدى
بۇل تۋرالى ءماجىلىس دەپۋتاتى، زاڭناما جانە سوت-قۇقىقتىق رەفورما كوميتەتىنىڭ مۇشەسى گۇلنار بيجانوۆا ايتتى، دەپ حابارلايدى قازاقپارات ءتىلشىسى.
ءماجىلىس وتىرىسىندا «ق ر كەيبىر زاڭنامالىق اكتىلەرىنە قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمعا شىعارىلدى.
«قاڭتار وقيعاسىندا ءبىرقاتار زاڭداعى سايكەسسىزدىكتەر انىقتالدى، سونىڭ سالدارىنان كۇش ورگاندارىنىڭ، جەدەل شتابتاردىڭ ءىس-قيمىلى ءتيىستى دەڭگەيدە ۇيلەستىرىلگەن جوق، ءىس جۇزىندە توتەنشە جاعدايدى جويۋ ءۇشىن كۇش-قۇرالدار بىرلىگى بولمادى. سوندىقتان، سالالىق زاڭداردا ەندى الەۋمەتتىك سيپاتتاعى توتەنشە جاعدايلاردىڭ الدىن الۋ جانە ولاردى جويۋ جونىندەگى مەملەكەتتىك ورگان باسشىلارىنىڭ دەربەس جاۋاپكەرشىلىگى ەنگىزىلەدى»، - دەدى گ. بيجانوۆا ءماجىلىستىڭ جالپى وتىرىسىندا.
ءوز كەزەگىندە، پرەزيدەنتكە الەۋمەتتىك سيپاتتاعى ت ج جانە ت ج رەجيمدەرىن قامتاماسىز ەتۋ بويىنشا قوسىمشا وكىلەتتىكتەر بەرىلەدى.
«ەندى توتەنشە جاعداي ەنگىزىلگەندە مەملەكەت باسشىسى مۇنداي رەجيمدى قامتاماسىز ەتۋ جونىندەگى مەملەكەتتىك كوميسسيانى قۇرادى جانە ونىڭ ءتوراعاسىن تاعايىندايدى. ول كەز كەلگەن مەملەكەتتىك ورگاننىڭ نەمەسە قۇقىق قورعاۋ بلوگىنىڭ وكىلى بولا الادى. «داعدارىس جاعدايى» جانە «الەۋمەتتىك-ەكونوميكالىق سالاداعى داعدارىستىق جاعداي» ۇعىمدارى دا ءبولىندى، رەسپۋبليكالىق جانە وڭىرلىك جەدەل شتابتار مەن مەملەكەتتىك ورگان ماسەلەلەرى ناقتى ايقىندالدى. ەندى جەدەل شتاب شەشىمىن بۇكىل ازاماتتار ورىنداۋعا مىندەتتى بولادى»، - دەپ ءتۇسىندىردى گ. بيجانوۆا.
سونىمەن بىرگە، الەۋمەتتىك سيپاتتاعى ت ج كەزىندە ورتالىق جانە جەرگىلىكتى مەملەكەتتىك ورگانداردىڭ بايلانىس قۇرالدارى مەن جەلىلەرى اجىراتىلمايدى. بۇعان ىشكى ىستەر ورگاندارى، توتەنشە جاعدايلار قىزمەتتەرى - جەدەل جاردەم، تجم قۇتقارۋشىلارى مەن ءورت سوندىرۋشىلەر، وق-ءدارى تاسىمالداۋ ۇيىمدارى جانە باسقالار كىرەدى. قاڭتار ايىندا بۇل قىزمەتتەردە بايلانىسپەن قيىندىق تۋىنداعان ەدى.
«توتەنشە جاعداي قاشان جانە قانداي جاعدايدا ەنگىزىلەتىنى جانە الەۋمەتتىك سيپاتتاعى ت ج قاشان بولاتىنى ناقتى انىقتالدى. بۇل قازىرگى زاڭداردا جوق. ءارقايسىسى ءۇشىن وزىندىك ەرەكشە جاعدايلار بار. مىسالى، جاپپاي ەرەۋىلدەر - الەۋمەتتىك سيپاتتاعى ت ج، ال قارۋلانعان جاپپاي تارتىپسىزدىك – ت ج. ەكى مىسالدىڭ دا وزىندىك ەرەكشەلىكتەرى مەن قۇقىقتىق رەجيمدەرى بار. قازىر زاڭ بويىنشا الەۋمەتتىك سيپاتتاعى ت ج كەزىندە اسكەردى پايدالانۋعا بولمايدى. ەندى جەدەل شتابتىڭ ۇسىنىسىمەن پرەزيدەنتتىڭ جارلىعى نەگىزىندە بۇل مۇمكىن بولادى»، - دەدى گ. بيجانوۆا.
جەرگىلىكتى جەردىڭ كومەندانتى پرەزيدەنتتەن زاڭمەن بەلگىلەنگەن جاعدايلاردا قارۋلى كۇشتەردى قولدانۋدى سۇراي الادى.
وبلىستاردىڭ (استانانىڭ، رەسپۋبليكالىق ماڭىزى بار قالانىڭ) اكىمدەرى دە جەدەل شتاب باسشىلارى رەتىندە الەۋمەتتىك سيپاتتاعى ت ج ەنگىزە الادى.
مەملەكەتتىك كۇزەت قىزمەتىنىڭ وكىلەتتىكتەرى كۇشەيتىلدى. ەندى ولارعا جەدەل شتابقا، مەملەكەتتىك كوميسسياعا نەمەسە كومەندانتقا قاراماي، كۇزەت جانە جەدەل ءىس-شارالار جۇرگىزۋ، باسقا مەملەكەتتىك ورگانداردىڭ كۇشتەرى مەن قۇرالدارىن تارتۋ قۇقىعى بەرىلەدى.
بۇعان دەيىن دەپۋتات قىزمەتتە قازا تاپقان جانە مۇگەدەك بولعانداردىڭ بالالارى قازاقستانداعى كەز كەلگەن ج و و- دا تەگىن وقيتىنىن ايتقان ەدى. سونداي-اق، قاڭتار وقيعاسىنان كەيىن بيلىك وكىلىنە باعىنباۋ، كۇش قولدانۋ ءۇشىن جازا كۇشەيتىلدى.
