قاڭتاردا ۇرلانعان قارۋ قايدا جاسىرىلۋى مۇمكىن – مينيستر جاۋابى
بۇل تۋرالى ىشكى ىستەر ءمينيسترى مارات احمەتجانوۆ ايتتى، دەپ حابارلايدى قازاقپارات ءتىلشىسى.
ءماجىلىستىڭ جالپى وتىرىسىنان كەيىن تىلشىلەر مينيستردەن قاڭتار وقيعاسىنا قاتىستى ىستەردى تەرگەۋ امالدارى قاشان اياقتالاتىنىن سۇرادى.
ءوز كەزەگىندە م. احمەتجانوۆ ۆەدومستۆو ۇرلىق، نىسانداردى توناۋ دەرەكتەرى بويىنشا تەرگەۋ جۇرگىزىلىپ جاتقانىن ايتتى.
قازىرگى كەزدە ىشكى ىستەر ورگاندارىنداعى قىلمىستىق ىستەردىڭ 80 پايىزى اياقتالىپ قالدى.
سونىمەن قاتار مينيستر قاڭتار وقيعاسى كەزىندە تارتىپسىزدىككە قاتىسقان قىلمىسكەرلەر قولىندا ءالى دە قارۋ بار ەكەنىن جەتكىزدى.
«قىلمىسكەرلەر قولىندا ۇرلاعان قارۋدىڭ ءبىر بولىگى قالىپ وتىر. وسىعان دەيىن قارۋدىڭ ءبىرازى تاركىلەندى. سونىمەن قاتار تىركەلمەگەن قارۋدى ساتىپ الۋ ناۋقانى دا جۇرگىزىلدى»، - دەدى م. احمەتجانوۆ.
ونىڭ ايتۋىنشا، ۇرلانعان قارۋ ەلىمىزدىڭ باسقا دا وبلىستارىنا شىعارىلۋى مۇمكىن. سوندىقتان قارۋ-جاراق ىزدەۋ جۇمىستارى قازاقستاننىڭ بارلىق وڭىرىندە جانە شەتەلدە دە جۇرگىزىلىپ جاتىر.
«ەگەر زاڭسىز قارۋ قىلمىسكەرلەردىڭ قولىندا بولسا، ولاردان قاتەر بار. سوندىقتان بارلىق قارۋ انىقتالعانشا ىزدەۋ جۇمىستارىن جالعاستىرامىز»، - دەدى ۆەدومستۆو باسشىسى.
بۇدان بۇرىن حابارلانعانداي، جاقىندا ءى ءى م تەرگەۋ دەپارتامەنتىنىڭ باستىعى سانجار ءادىلوۆ قاڭتار وقيعاسى كەزىندە ۇرلانعان 2 مىڭنان استام قارۋ ءالى قىلمىسكەرلەردىڭ قولىندا ەكەنىن ايتتى.
