قىزمەتتە قازا تاپقان جانە مۇگەدەك بولعانداردىڭ بالالارى كەز كەلگەن ج و و- دا تەگىن وقيدى - ءماجىلىس
بۇل تۋرالى ءماجىلىس دەپۋتاتى، زاڭناما جانە سوت-قۇقىقتىق رەفورما كوميتەتىنىڭ مۇشەسى گۇلنار بيجانوۆا ايتتى، دەپ حابارلايدى قازاقپارات ءتىلشىسى.
ءماجىلىس وتىرىسىندا «ق ر كەيبىر زاڭنامالىق اكتىلەرىنە قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمعا شىعارىلدى.
«حالقىمىز «ءولى رازى بولماي، ءتىرى بايىمايدى» دەيدى. مەملەكەت قىزمەتىن ورىنداۋ كەزىندە قازا تاپقان قىزمەتكەرلەردىڭ وتباسىنا ەرەكشە قامقورلىق جاساۋى ءتيىس. قاڭتار ايىنىڭ قاتال كۇندەرىندە ناق سولار ءبىزدىڭ تاۋەلسىزدىگىمىزدى ساقتاپ قالدى. حالىقتىڭ قاۋىپسىزدىگى ءۇشىن ءوز ءومىرى مەن دەنساۋلىعىن قۇربان ەتۋگە باتىلدىق پەن دايىندىعىن كورسەتتى. ەلىمىز ولاردىڭ الدىندا قارىزدار دەپ سانايمىز. بۇل تۋرالى مەملەكەت باسشىسى بىرنەشە رەت اتاپ وتكەن بولاتىن»، - دەدى گ. بيجانوۆا ءماجىلىستىڭ جالپى وتىرىسىندا.
سپيكەر قىزمەتىن ورىنداۋ كەزىندە قازا تاپقانداردىڭ وتباسى، بالالارى جانە جاقىن تۋىستارى نازاردان تىس قالماۋى كەرەگىن ايتتى. سوندىقتان بارلىق كۇشتىك قۇرىلىمداردىڭ قازا تاپقان قىزمەتكەرلەرىنىڭ بالالارى مەن تۋىستارى ءۇشىن ءبىرقاتار الەۋمەتتىك جەڭىلدىكتەر بويىنشا تۇزەتۋلەر قولداۋ تاپتى.
«ءبىرىنشىسى - قىزمەتىن ورىنداۋ كەزىندە قايتىس بولعان قىزمەتكەردىڭ وتباسىنا اي سايىنعى تولەمدەر قايتىس بولعان قىزمەتكەردىڭ اقشالاي قاراجاتى نەگىزىندە تولەنەدى. مۇنداي تولەمدەردى اۋىر جاراقات الۋىنا بايلانىستى ورگانداردا قىزمەتىن جالعاستىرا المايتىن قىزمەتكەرلەر دە الاتىن بولادى. بۇل وتىنىشتەردى بيىلعى اقپان ايىندا الماتىعا ساپارىمىز كەزىندە قاڭتار ايىنداعى شايقاستاردا جارالانعان قۇقىق قورعاۋ ورگاندارى قىزمەتكەرلەرى ايتتى»، - دەدى گ. بيجانوۆا.
ەكىنشىسى - قازا تاپقان جانە مۇگەدەك بولعان قىزمەتكەرلەردىڭ بالالارىنا ارنالعان مەملەكەتتىك گرانتتار. ولار ەلىمىزدىڭ كەز كەلگەن جوعارى وقۋ ورنىندا تەگىن جوعارى ءبىلىم الا الادى.
«ءۇشىنشىسى - قىزمەتكەردىڭ ءوز مىندەتتەرىن ورىنداۋ جانە سوت تورەلىگىن جۇزەگە اسىرۋ كەزىندە مۇلكىنە كەلتىرىلگەن زالالدى وتەۋدىڭ قوسىمشا شارالارى بويىنشا تۇزەتۋلەر قولداۋ تاپتى. بۇل ادامداردىڭ قاۋىپسىزدىگىن قامتاماسىز ەتۋگە باعىتتالعان مەملەكەتتىڭ ازاماتتار الدىنداعى الەۋمەتتىك جاۋاپكەرشىلىگىنىڭ ءبىر بولىگى دەپ ويلايمىز»، - دەدى گۇلنار بيجانوۆا.
