رەسەيدىڭ سىرتقى ىستەر ءمينيسترى ۋكرايناداعى استىق ماسەلەسى بويىنشا كەلىسسوز جاساۋعا انكاراعا كەلدى
تاراپتار ۋكراينا پورتتارىندا تۇرىپ قالعان بيدايدى ەكسپورتتاۋ ماسەلەسىن تالقىلايدى. وسىنىڭ الدىندا تەڭىز شەكاراسى رەسەيمەن دە، ۋكراينامەن دە شەكتەسەتىن تۇركيا ارا اعايىندىق جاساۋعا دايىن ەكەنىن جەتكىزگەن بولاتىن. بۇل ۇسىنىستى بىرىككەن ۇلتتار ۇيىمى دا قولداپ وتىر.
قالىپتاسقان جاعدايعا بايلانىستى وسىنىڭ الدىندا افريكا وداعىنا ءتوراعالىق ەتەتىن سەنەگال پرەزيدەنتى رەسەيگە كەلىپ، ۆلاديمير پۋتينمەن استىق پەن تىڭايتقىش جەتكىزۋ بويىنشا كەلىسسوزدەر جۇرگىزدى. ۋكرايناداعى سوعىستان افريكا ەلدەرى قاتتى زارداپ شەكتى. قۇرلىققا يمپورتتالاتىن بيدايدىڭ شامامەن % 40- ءى رەسەي مەن ۋكراينادان تاسىمالدانادى.
ماكي سالل، سەنەگال پرەزيدەنتى، افريكا وداعىنىڭ ءتوراعاسى:
- افريكا گۋمانيتارلىق كومەك سۇراپ وتىرعان جوق. بىزگە ساۋدا- ساتتىق كەرەك. ءبىز بيدايدى ساتىپ الۋعا قاۋقارلىمىز. ءبىراق بۇل باعىتتا كەدەرگىلەر بولماۋى ءتيىس.
ۆلاديمير پۋتين استىق تيەلگەن كەمەلەردىڭ افريكاعا ەش كەدەرگىسىز جىبەرىلەتىنىن ايتتى. الايدا كرەمل باسشىسى ول ءۇشىن ۋكراينا ءوز كەمەجايلارىن مينادان تازارتۋى كەرەك دەيدى. ايتۋىنشا، الەمدىك نارىقتاعى قيىندىقتار پاندەميا كەزىندە باستالعان. ياعني بۇل بۇرىننان بار ماسەلە ەكەنىن ەسكە سالدى.
ۆلاديمير پۋتين، رەسەي پرەزيدەنتى:
- ۋكراينادان وزگە ەلدەرگە استىق الىپ شىعارۋعا ءبىز كەدەرگى كەلتىرىپ جاتقان جوقپىز. ونى تاسىمالداۋدىڭ بىرنەشە جولى بار. ماسەلەن، ودەسسا سەكىلدى ۋكراينا قارۋلى كۇشتەرىنىڭ باقىلاۋىنداعى كەمەجايلار ارقىلى نەگە شىعارماسقا؟ وندا بارار جولدارعا جارىلعىش زاتتار قويىپ تاستاعان ءبىز ەمەس قوي. سوندىقتان تاعى دا ايتامىن - مينالار زالالسىزداندىرىلسىن. ال ءبىز ءوز تارابىمىزدان كەمەلەردىڭ حالىقارالىق سۋدا قاۋىپسىز قاتىناۋىن قامتاماسىز ەتەمىز.
ۋكراينا جاعى ودەسسا كەمەجايىنان ەكسپورتتىڭ قايتا جاندانۋىنا قاجەتتى جاعداي جاساۋعا دايىن ەكەندەرىن ايتادى. العاشقى قادام رەتىندە كيەۆ ماسكەۋدەن تاقاۋ ماڭداعى اسكەرىن اكەتۋىن جانە شابۋىل جاساماۋعا كەپىلدىك بەرۋىن تالاپ ەتىپ وتىر.
ەۆگەنيا فيليپەنكو، ۋكراينانىڭ ب ۇ ۇ جانىنداعى تۇراقتى وكىلى:
- رەسەي وكىلدەرى ۋكراينانى ايىپتاپ وتىر. ولار افريكاداعى اشتىقتى ۋكرايناداعى قارۋلى قاقتىعىستىڭ باستالۋىمەن ەمەس، باتىس ەلدەرىنىڭ سانكسيالارىمەن بايلانىستىرىپ وتىر. ب ۇ ۇ مالىمەتىنە سايكەس، استىق قۇنىنىڭ مامىرداعى يندەكسى كەيىنگى 14 جىلدا بولماعان كورسەتكىشتەرگە جەتكەن. بيداي وسىمەن ءتورت اي بويى قىمباتتاپ كەلەدى.
ساراپشىلاردىڭ ايتۋىنشا، سوعىس جالعاسىپ، ۋكراينا مەن رەسەيدەن بيداي، جۇگەرى مەن سۇيىق مايدىڭ ەكسپورتى قىسقارسا، جىل سوڭىنا دەيىن الەمدە 18 ميلليون ادام اشتىق زاردابىن تارتۋى مۇمكىن.
www.24.kz
