ءبىلىم جانە عىلىم مينيسترلىگى قالاي بولىنەدى - دەپۋتاتتار ۇسىنىسى

نۇر- سۇلتان. قازاقپارات - ءبىلىم جانە عىلىم مينيسترلىگىنىڭ ەكى ۆەدومستۆوعا ءبولىنۋى - جۇمىستىڭ جۇيەلى جۇرگىزىلۋىن قامتاماسىز ەتەدى. ق ر پارلامەنتى ءماجىلىسىنىڭ دەپۋتاتى ساياسات نۇربەكتىڭ پىكىرى وسىعان سايادى.

«ءبۇتىن ءبىر مينيسترلىك بالانىڭ بالاباقشادان باستاپ عىلىمعا دەيىنگى جولىن قامتىپ جاتىر. مەن بۇل سالادا كوپ جىلدار ەڭبەك ەتكەننەن كەيىن جاعدايدى بىلەمىن. بىزدەگى مينيسترلەردىڭ %70 ى جوعارى ءبىلىمدى جاقسى بىلەدى. دەگەنمەن مەكتەپ، كاسىپتىك ءبىلىم سالاسىنان بەيحابار. سول تاجىريبەسى تەك جوعارى ءبىلىم سالاسىنا نەگىزدەلگەن قاراپايىم ءبولىم باسشىسى بۇكىل ورتا جانە كاسىپتىك بىلىمگە ءوز ساياساتىن جۇرگىزەدى. ال مينيسترلىك ءبىلىمنىڭ ءار ساتىسىن ساپالى قامتۋعا قاۋقارسىز بولىپ وتىر. سەبەبى ءار باعىتتا ميلليونداعان بالا مەن مىڭداعان ۇستازدىڭ ماسەلەسى تۇر. كورشىلەس وزبەكستاننىڭ وزىندە 3 مينيسترلىك بار. ول جۇمىستى ءتيىمدى ۇيىمداستىرۋعا ىقپال ەتەدى»، - دەدى ساياسات نۇربەك.

بۇدان بولەك دەپۋتات مينيسترلىكتى ءبولۋ جۇمىسىنداعى قيىندىقتارعا توقتالدى. «مەكتەپكە دەيىنگى، ورتا جانە كاسىپتىك ءبىلىمدى قامتيتىن ورگان - ءبىلىم مينيسترلىگى، ال جوعارى ءبىلىم مەن عىلىمعا جاۋاپتى يننوۆاتسيا، جوعارى ءبىلىم جانە عىلىم مينيسترلىگى قۇرىلسا دەپ ويلايمىن. ەندى وسى مينيسترلىك قۇرامىنا كىرەتىن كوميتەتتەردىڭ بولىنىسىنە قاتىستى وزەكتى ماسەلەلەر بار. ماسەلەن، بالاباقشا، مەكتەپ، كوللەدجدەر ءبىلىم باسقارماسىنا قارايدى. ال ول ءوز كەزەگىندە اكىمدىككە باعىنادى. كادرلىق ساياساتى مەن ءبىلىم باعىتى اكىمدىك قۇزىرىندا. سوندا جاڭادان قۇرىلاتىن مينيسترلىك تەك قارجى ءبولىپ وتىراتىن ورگان رەتىندە قالىپ قويادى. سوندىقتان ولاردى اكىمدىك قۇزىرىنان شىعارىپ، مينيسترلىككە وتكىزۋ قاجەت. بۇدان وزگە ءبىلىم ساپاسىن باقىلاۋ كوميتەتىنىڭ ءبولىنۋى قيىن ماسەلە. بۇل قاي مينيسترلىكتىڭ قۇرامىندا قالۋى كەرەك؟ ارينە ەكى ۆەدومستۆاعا دا اتالعان ورگان قاجەت. ەكىنشى - ول ءتىل كوميتەتى. وندا جۇيەلى جۇمىس قالىپتاسپاعان. تيىسىنشە ناتيجە بولمايدى. سوندىقتان ونى مادەنيەت جانە سپورت نەمەسە اقپارات جانە قوعامدىق دامۋ مينيسترلىگىنە بەرۋ ورىندى دەپ ويلايمىن»، - دەدى ول.

ساياسات نۇربەكتىڭ پىكىرىنشە، مينيسترلىككە قاراستى بالالار قۇقىعىن قورعاۋ كوميتەتىن دە ارنايى ورگان ەتىپ شىعارۋ كەرەك. سونىمەن قاتار دەپۋتات ۆەدومستۆو بولىنسە، قىزمەتكەرلەر جەتىسپەۋى مۇمكىن ەكەنىن ايتتى.

«بۇرىن مەن قىزمەت ەتكەن كەزەڭدە مينيسترلىكتە بارلىعىن قوسا العاندا 800 دەي قىزمەتكەر بولاتىن. ودان بەرى بىرنەشە رەت قىسقاردى. بۇگىندە 400 گە جۋىق ەڭبەككەر بار. ەندى ونى ەكىگە بولسە، 200 ادامنان كەلەدى. وسىنى ەسكەرە كەلە بۇل مينيسترلىكتەر قانشالىقتى جۇمىس ىستەي الادى دەگەن سۇراق تۋىندايدى»، - دەپ اتاپ ءوتتى ق ر پارلامەنتى ءماجىلىسىنىڭ دەپۋتاتى.

ال ق ر پرالامەنتى سەناتىنىڭ دەپۋتاتى مۇرات باقتيار ۇلى مينيسترلىكتى ءبولۋ كەزىندە شتات سانىن ارتتىرۋدىڭ قاجەتى جوق ەكەنىن العا تارتتى. ونىڭ سوزىنشە، جاڭادان تاعايىندالاتىن 3-4 ۆيتسە- مينيسترگە شتات قاراستىرىلسا جەتكىلىكتى.

«مەن مينيسترلىكتى ەكىگە ءبولۋ تۋرالى ۇسىنىستى وسىدان ەكى جىل بۇرىن ايتقانمىن. دەگەنمەن ول كەزدە باستاما قولداۋ تاپپادى. بالاباقشا، ورتا مەكتەپ، ارناۋلى ورتا جانە جوعارى ءبىلىم ورىندارى مەن عىلىمنىڭ بارلىعى ءبىر مينيسترلىككە قارايدى. بۇل - دۇرىس ەمەس. كەز كەلگەن ءوز- ءوزىن سىيلايتىن مەملەكەت ءبىلىم سالاسىنا اسا ءمان بەرەدى. سوندىقتان ونى باسقارۋ جەڭىل، يكەمدى بولۋى ءتيىس. مەنىڭ ويىمشا، بالاباقشا، ورتا مەكتەپ جانە كوللەدجدەر ءبىر مينيسترلىكتىڭ قۇرامىندا بولۋى كەرەك. ول اعارتۋ مينيسترلىگى بولسا، ەكىنشىسى جوعارى ءبىلىم جانە عىلىم مينيسترلىگى دەپ قۇرىلعانى ءجون دەپ ويلايمىن. ويتكەنى ءبىزدىڭ ەلدە عىلىم دامىماي قالدى. ەگەر ونىڭ باسقارۋ جۇيەسىن وزگەرتىپ، ۇيىمداستىرۋ شارالارىن جولعا قويسا، ىلگەرىلەۋ باستالادى. ەكى مينيسترلىككە بولگەننەن مەملەكەتكە جانە وزگە دە ورگاندارعا كەلەتىن شىعىن جوق. تەك قاراماعىنداعى كوميتەتتەردى قاجەتتى سالالار بويىنشا تەڭ ءبولىپ شىعارادى»، - دەدى مۇرات باقتيار ۇلى.

دەپۋتات بىرنەشە ۇسىنىس ايتتى. ونىڭ ايتۋىنشا، مەكتەپ ديرەكتورلارى مەن جوعارى وقۋ ورىندارىنىڭ رەكتورلارىن تاعايىنداۋدى توقتاتۋ كەرەك.

«ديرەكتورلاردى اتا- انالار، ساراپشىلار جانە مەكتەپ ۇجىمى وزدەرى سايلاپ الۋى ءتيىس. كوپ شەت مەملەكەتتەردە وسىنداي ءتارتىپ بويىنشا ديرەكتورلاردى سايلاۋ مۇمكىندىگى بار. ەكىنشىدەن، مەكتەپ ءبىلىمنىڭ نەگىزگى وزگەگى بولعاندىقتان وعان باسىبايلى بيلىك بەرۋ كەرەك. پرەزيدەنت قاسىم- جومارت توقايەۆتىڭ تاپسىرماسىنا سايكەس، بارلىعىن ءبىر ورتالىقتان باسقارۋ جۇيەسىنەن باس تارتۋىمىز قاجەت. قازىرگى تاڭدا بولىپ جاتقان قاراپايىم مىسال – ج و و رەكتورىن تاعايىنداۋعا مينيستر ارالاسادى. سونىڭ سالدارىنان بىلىكتى ماماندار بۇل قىزمەتكە وتە الماي ءجۇر»، - دەيدى مۇرات باقتيار ۇلى.

دەپۋتات ماسەلەنىڭ وڭتايلى شەشىمى رەتىندە جوعارى وقۋ ورىندارىنىڭ ىشىنەن كەڭەس قۇرىپ، بىرنەشە كانديداتتىڭ اراسىنان بىرەۋىنە داۋىس بەرۋ ارقىلى سايلاۋ وتكىزۋدى ۇسىندى.

اۆتور: ءاليحان اسقار