قىتاي ايعا، مارسقا جانە ودان باسقا پلانەتالارعا ۇشۋدى جوسپارلاپ وتىر

قىتايدىڭ ۇلتتىق عارىش باسقارماسى 2003 -جىلى 300 ميلليون ا ق ش دوللارلىق باستاپقى جىلدىق بيۋدجەتىمەن قۇرىلدى. 2016 -جىلى قىتاي ءوزىنىڭ عارىش سالاسىن جەكە كومپانيالارعا اشتى جانە قازىر ولار جىلىنا 1,5 ميلليارد دوللاردان استام ينۆەستيتسيا سالادى. قازىرگى ۋاقىتتا قىتايدىڭ عارىش جوبالارىندا 300 مىڭعا جۋىق ادام جۇمىس ىستەيدى، بۇل ا ق ش- تىڭ NASA عارىش اگەنتتىگىنە قاراعاندا 18 ەسە كوپ. ناتيجەسىندە 2021 -جىلى بەيجىڭ ءوزىنىڭ تيانگۋن عارىش ستانتسياسىنىڭ العاشقى ءمودۋلىن وربيتاعا شىعاردى. جىلدىڭ سوڭىنا قاراي وعان «Mengtian science lab» عىلىمي زەرتحاناسىنىڭ قوسىمشا ءمودۋلىن، ال كەلەسى جىلى «Xuntian» عارىشتىق تەلەسكوپىن قوسۋ جوسپارلانعان.

بولاشاقتا «تيانگۋننىڭ» جەكە ەلەكتر ستانتسياسى، قوزعالتقىش قوندىرعىسى، تىرشىلىكتى قامتاماسىز ەتۋ جۇيەلەرى جانە تۇرعىن ءۇي- جايلارى بولادى. ءۇش قىتايلىق استروناۆت ەلدىڭ جاڭا عارىش ستانتسياسىندا جۇمىس ىستەۋ ءۇشىن التى ايلىق ميسسيانى باستادى. بۇل - قىتايدىڭ جەتەكشى عارىشتىق دەرجاۆا بولۋ جولىنداعى سوڭعى قادامى رەتىندە قاراستىرىلادى. ءبىر قىزىعى، قىتايلىق استروناۆتارعا حعس- ىنا شىعۋعا رۇقسات ەتىلمەيدى، ويتكەنى ا ق ش زاڭناماسى NASA- عا قىتايمەن دەرەكتەردى بولىسۋگە تىيىم سالادى.

ۇلى بريتانياداعى پورتسمۋت ۋنيۆەرسيتەتىنىڭ عارىش جوبالارى جەتەكشىسى ليۋسيندا كينگ قىتايدىڭ ايعا ۇشۋى ءبىر جاعىنان ونىڭ بەتىنەن سيرەك كەزدەسەتىن مەتالداردى الۋ مۇمكىندىگىنە نەگىزدەلگەن دەپ سانايدى. لوندون عارىش ساياساتى جانە قۇقىق ينستيتۋتىنىڭ ديرەكتورى، پروفەسسور سايد مۋستەشار قىتايدىڭ عارىش باعدارلاماسى الەمگە ءوزىنىڭ كۇشى مەن تەحنولوگيالىق پروگرەسىن كورسەتۋگە دەگەن ۇمتىلىسىن كورسەتەدى دەپ سانايدى.