قاراعاندىدا پەرزەنتحانادا جاس كەلىنشەك قايتىس بولدى
مارقۇمنىڭ تۋىستارى پەرزەنتحانا دارىگەرلەرىن نەمقۇرايلىلىق تانىتتى دەپ ايىپتاپ وتىر.
اتالعان دەرەك بويىنشا تەرگەۋ باستالدى. الەۋمەتتىك جەلىلەردە بوسانعاننان كەيىن قايتىس بولعان 24 جاستاعى دينارا ليەۆەنكونىڭ ءسىڭلىسى جازعان بەينە تاراپ كەتتى.
ۆيدەو اۆتورىنىڭ ايتۋىنشا، ونىڭ اپكەسىندە اۋرۋحانادان شىققاندا ىشكى قان كەتۋ بولعان. ءبىراز ۋاقىت وتكەن سوڭ دارىگەرلەر ونىڭ جاتىرىن الىپ تاستاعان. سول وتادان سوڭ دينارادا سەپسيس پايدا بولىپ، مي ءىسىنۋى بايقالادى.
«ءبىزدىڭ وتباسىمىزدا بولعان قايعىمەن سىزدەرمەن بولىسكىم كەلەدى. مەنىڭ اپكەم 29- ساۋىردە قاراعاندى قالاسىنىڭ 1№ وبلىستىق پەريناتالدىق ورتالىعىندا بوساندى. سودان كەيىن ونى ءالسىز جاعدايدا، قاتتى اۋىرسىنۋمەن جانە دەنە قىزۋى كوتەرىلىپ تۇرعانىنا قاراماستان، اۋرۋحانادان ۇيگە جىبەردى. ءبىر كۇندە گەموگلوبينى 50 گە دەيىن تومەندەدى، بۇل ىشكى قان كەتۋدى بىلدىرەدى. سونان سوڭ ءدال وسى پەرزەنتحانادا ونىڭ جاتىرىن الىپ تاستاۋ وتاسى جاسالدى. ناتيجەسىندە، اۋرۋحانادا اپكەمدە قان ينفەكتسياسى پايدا بولدى، سەپسيس ءبىلىندى، بۇل ميدىڭ ىسىنۋىنە، سودان كەيىن ولىمگە اكەلەدى. 21-كۇنى مەنىڭ اپكەم - دەنى ساۋ 24 جاستاعى كەلىنشەك اكۋشەرلىك سەپسيستەن قايتىس بولدى. بۇنىڭ دارىگەرلەردىڭ كىناسىنەن ورىن العانىنا سەنىمدىمىن»، - دەدى قايتىس بولعان ايەلدىڭ اپكەسى انار ماعزۇموۆا.
مارقۇمنىڭ تۋىستارى بۇل فاكتىنى ۋاكىلەتتى ورگانداردىڭ مۇقيات تەكسەرۋىن جانە كىنالىلەردى جازالاۋدى تالاپ ەتىپ وتىر.
قازىرگى تاڭدا مەديتسينالىق جانە فارماتسيەۆتيكالىق قىزمەت كورسەتۋ ساپاسىن باقىلاۋ كوميتەتى جاعدايدى تالداۋدا.
«قازىرگى ۋاقىتتا بوسانعان ايەل ليەۆەنكونىڭ قايتىس بولۋ فاكتىسى بويىنشا جوسپاردان تىس تەكسەرۋ جۇرگىزىلۋدە. تەكسەرۋ ناتيجەلەرى تۋرالى قوسىمشا حابارلاناتىن بولادى»، - دەپ مالىمدەدى قاراعاندى وبلىسىنىڭ دەنساۋلىق ساقتاۋ باسقارماسى.
پوليتسيا دەپارتامەنتى «مەديتسينا قىزمەتكەرلەرىنىڭ كاسىبي مىندەتتەرىن تيىسىنشە ورىنداماۋى» بابى بويىنشا سوتقا دەيىنگى تەرگەۋدى باستادى.
ساراپتاما تاعايىندالدى. وقيعا سالدارىنان ەكى بالا جەتىم قالدى. دينارا ليەۆەنكونىڭ ۇلكەن ۇلى 6 جاستا.
