سارى ارقا ارقىلى س ق و- عا گاز تارتۋدىڭ تەحنيكالىق- ەكونوميكالىق نەگىزدەمەسى جاسالىپ جاتىر

«گازبەن جابدىقتاۋدىڭ بالامالى نۇسقاسى - «سارى ارقا» ماگيسترالدىق گاز قۇبىرىنان گاز جەتكىزۋ. قازىرگى تاڭدا اقمولا جانە سولتۇستىك قازاقستان وبلىستارىن «سارى ارقا» ماگيسترالدىق گاز قۇبىرى ارقىلى گازداندىرۋدىڭ تەحنيكالىق- ەكونوميكالىق نەگىزدەمەسىنە تۇزەتۋ ەنگىزىلدى. مەملەكەتتىك ساراپتامانى ماۋسىم ايىندا الامىز دەپ وتىرمىز»، - دەدى ەنەرگەتيكا ءمينيسترى بولات اقشولاقوۆ ماجىلىستە وتكەن ۇكىمەت ساعاتىندا.

بولات اقشولاقوۆتىڭ سوزىنە قاراعاندا، شىعىس قازاقستان وبلىسى مەن سولتۇستىك وڭىرلەردى گازداندىرۋدىڭ وڭتايلى نۇسقاسى بىرنەشە كريتەرييگە نەگىزدەلمەك.

ولار: - گازداندىرۋدىڭ سەنىمدىلىگى، تۇراقتىلىعى جانە تۇتىنۋشىلار ءۇشىن گازدىڭ بارىنشا قولايلى باعاسى؛

- رەسۋرستىق بازانىڭ بولۋى؛

- الەۋمەتتىك- ەكونوميكالىق اسەرگە بارىنشا قول جەتكىزۋ؛

- الەمدەگى احۋالدى ەسكەرە وتىرىپ، ەنەرگەتيكالىق قاۋىپسىزدىكتى قامتاماسىز ەتۋ.

«گازبەن جابدىقتاۋ وبەكتىلەرىنىڭ نەگىزگى بولىگىن جەرگىلىكتى اتقارۋشى ورگاندار بيۋدجەت قاراجاتى ەسەبىنەن مەردىگەر ۇيىمدارمەن شارتقا قول قويۋ ارقىلى سالىنادى. وسىدان كەيىن «قازاق گازعا» ودان ءارى پايدالانۋ ءۇشىن بەرىلۋى قاجەت»، - دەدى ۆەدومستۆو باسشىسى.

بۇعان دەيىن ق ر ەنەرگەتيكا مينيسترلىگى رەسەيدەن گاز تارتۋ ءۇشىن شەكارالاس وبلىستاردىڭ قاجەتتىلىكتەرىن زەرتتەپ جاتقاندارىن حابارلاعان ەدى.

اۆتور: ەسىمجان ناقتىباي