اتىراۋدا اسكەريلەر مەن ەرىكتىلەر مەملەكەتتىك تۋدى ۇستاپ، شەرۋ قۇردى - فوتو
اسكەريلەر مەن ۆولونتەرلەر كوك تۋدى ۇستاپ، بەيبارىس الاڭىنان مەملەكەتتىك رامىزدەر الاڭىنا دەيىن شەرۋ قۇردى. اسكەري قاراۋىل مەملەكەتتىك تۋدى تۋتۇعىرعا كوتەرىپ، ءانۇران ورىندالدى، دەپ حابارلايدى قازاقپارات ءتىلشىسى.
«مەملەكەتتىك رامىزدەر - سوناۋ ىقىلىم زامانداردان سىر شەرتەر تاعىلىمدى تاريحىمىزدىڭ شىنايى كورىنىسى، ەگەمەندىگىمىزدى ايقىندايتىن، ەل ەرتەڭىنە دەگەن بەرىك سەنىمدى ۇيالاتاتىن قاسيەتتى نىشاننىڭ ءبىرى. حالقىمىزدىڭ رۋحىن، ۇلتتىق سالت- ساناسىن، قاھارماندىعى مەن دانالىعىن، بولاشاققا دەگەن ءۇمىتىن، ارمان- تىلەگىن پاش ەتەتىن، ورتاق ماقساتقا توپتاستىرىپ، بىرىكتىرۋشى كۇشكە يە مەملەكەتتىك رامىزدەردى كوزىمىزدىڭ قاراشىعىنداي ساقتاپ، قاستەرلەي بىلەيىك! كوك تۋىمىز بيىكتە جەلبىرەپ، ءانۇرانىمىز اسقاقتاي بەرسىن!» - دەدى وبلىس اكىمى سەرىك شاپكەنوۆ. مەملەكەتتىك رامىزدەردىڭ 30 جىلدىعىنا ارنالعان ءىس-شاراعا قارۋلى كۇشتەر مەن ۇلتتىق ۇلان اسكەريلەرى، ەتنومادەني بىرلەستىكتەردىڭ وكىلدەرى جانە مەكتەپ وقۋشىلارى قاتىستى. جەرگىلىكتى ونەرپازدار پاتريوتتىق اندەردى شىرقادى.
ەسكە سالا كەتەلىك، بۇدان بۇرىن اتىراۋدا بيىكتىگى 91 مەترلىك تۋتۇعىر ورناتىلعانىن حابارلاعان ەدىك.
اۆتور: بەك مۇستافا
