كەنتاۋ قالاسىنىڭ تۇرعىندارى بالكونعا تۋ ءىلىپ، ءانۇراندى ورىندادى
تۇركىستان وبلىسىندا قازاقستان رەسپۋبليكاسىنىڭ مەملەكەتتىك رامىزدەر كۇنى جوعارى دەڭگەيدە اتالىپ ءوتىپ جاتىر. ءاربىر اۋدان، قالادا رامىزدەر كۇنىنە ارنالعان ءداستۇرلى اۆتوشەرۋ ۇيىمداستىرىلدى. ال، كەنتاۋ قالاسىندا تۇرعىندار كوپقاباتتى ۇيلەردىڭ بالكونىنا تۋ ءىلىپ، ءانۇراندى شىرقادى.
«وسكەلەڭ ۇرپاققا وسىنداي مەرەكە بار ەكەنىن جانە مەملەكەتتىك رامىزدەر ءبىزدىڭ ماقتانىشىمىز ەكەنىن كورسەتۋ، جەتكىزۋ ماڭىزدى. ءبىز وسى شەرۋ ارقىلى پاتريوتيزمدى كورسەتكىمىز كەلدى. بۇل مەرەكەنى جوعارى دەڭگەيدە اتاپ ءوتۋىمىز كەرەك»، - دەيدى قالا تۇرعىنى قانات بەكمەتوۆ.
قالادا «مەملەكەتتىك رامىزدەر - ەل مارتەبەسى» ءىس شاراسى ءوتتى.
وندا قالا اكىمىنىڭ ورىنباسارى اقنۇر بايبولوۆا مەن قالالىق ءماسليحات حاتشىسى تالعات بالابيەۆ قالا تۇرعىندارىن رامىزدەرىمىزدىڭ 30 جىلدىعىمەن قۇتتىقتادى. ءىس-شارا ءشامشى قالداياقوۆ اتىنداعى مادەنيەت سارايىنىڭ ونەرپازدارى ازىرلەگەن كونسەرتتىك باعدارلاماعا ۇلاستى. جاستار تاۋەلسىزدىگىمىزدى ۇلىقتايتىن پاتريوتتىق اندەر شىرقادى.
اۆتور: قايرات زاينيشەۆ
