سەنات دەپۋتاتى: رەفەرەندۋم - بيلىك پەن حالىق اراسىنداعى الشاقتىقتى جويۋدىڭ جولى
وسى ورايدا رەفەرەندۋم مەن ونىڭ ماڭىزدىلىعىنا قاتىستى ق ر پارلامەنتى سەناتىنىڭ دەپۋتاتى نۇرلان بەكنازاروۆ ويىمەن ءبولىستى، دەپ حابارلايدى قازاقپارات ءتىلشىسى.
«پرەزيدەنت رەفەرەندۋم وتەتىنى تۋرالى جاريالاعاننان كەيىن دەپۋتاتتار وڭىرلەردى ارالاپ، 1 اي بويى حالىق اراسىندا ءتۇسىندىرۋ جۇمىستارىن وتكىزدىك. كونستيتۋتسياعا قاتىستى ساياسي وزگەرىستەر مەن رەفورلامالاردى ءبىز 2017 -جىلى قولعا الدىق. 2019 -جىلى وزگەرىستەر مەن رەفورمالار جالعاسىن تاپتى. 5-ماۋسىمدا جالپىحالىقتىق رەفەرەندۋم وتەدى، سوندىقتان ونىڭ ءجونى مەن ماڭىزى بولەك. رەفەرەندۋم - بيلىك پەن حالىق اراسىنداعى الشاقتىقتى جويۋدىڭ جولى. مەملەكەت باسشىسى حالىققا ارنالعان ءار جولداۋىندا ساياسي رەفورمالاردىڭ ماڭىزدىلىعى تۋرالى ۇنەمى ايتادى. وسى ورايدا رەفەرەندۋمنان كۇتەتىن ءۇمىت زور»، - دەدى نۇرلان بەكنازاروۆ ەلورداداعى ەۋرازيا ۇلتتىق ۋنيۆەرسيتەتىنىڭ جۇرتشىلىعىمەن كەزدەسۋ بارىسىندا.
سەنات دەپۋتاتىنىڭ ايتۋىنشا، بيلىك پەن حالىق اراسىندا ءوزارا سەنىمنىڭ بولۋى ەلدىڭ ودان ءارى دامۋى ءۇشىن ماڭىزدى. بۇل ورايدا حالىق ەلدە بولىپ جاتقان ساياسي رەفورمالار مەن وزگەرىستەرگە بەلسەنە ارالاسىپ، ءوز ءۇنىن جەتكىزگەنى ءجون.
«سول سياقتى مەملەكەتتىڭ ساياسي جانە ەكونوميكالىق تۇرعىدان ىلگەرىلەي تۇسۋىنە ىشكى جاعدايمەن قاتار سىرتقى جاعدايدا اسەر ەتەدى. سوڭعى ۋاقىتتا الەمدەگى گەوساياسي جاعداي اسا ءماز ەمەس، ونى وزدەرىڭىز ءبىلىپ وتىرسىزدار. الپاۋىت ەلدەردىڭ ءوزى تەڭسەلىپ جاتىر. بۇدان بولەك، پاندەميانىڭ سالدارى ءالى تولىق جويىلعان جوق. سونداي- اق، بيىلعى قاڭتار وقيعاسىنان دا حابارلارىڭىز بار. جوعارى اتالعان جايتتاردىڭ بارلىعى ءار مەملەكەتكە بەلگىلى ءبىر دەڭگەيدە اسەرىن تيگىزەدى. جاھاندىق جانە ىشكى ساياسي جاعدايلار ەل تاعدىرىنا قاتىستى ماڭىزدى شەشىمدەردى ءدال ءقازىر قابىلداۋ كەرەكتىگىن كورسەتىپ وتىر. ءوز ەلىمىزگە كەلسەك، مەملەكەت باسشىسى ساياسي شەشىمدەردى ۋاقىتىلى قابىلداپ جاتىر. 5-ماۋسىمدا وتەتىن رەفەرەندۋم سونىڭ كۋاسى»، - دەيدى ول.
سونداي- اق، حالىق قالاۋلىسى قازاقستاندىقتار رەفەرەندۋمعا قاتىسقاندا «داۋىس بەرۋىم كەرەك» دەپ قانا ەمەس، ونىڭ ماڭىزدىلىعىنا ءمان بەرۋ كەرەكتىگىن تىلگە تيەك ەتتى.
ايتا كەتسەك، بۇگىن ەلورداداعى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە «كونستيتۋتسيالىق رەفورمالاردىڭ جاڭا قازاقستان ءۇشىن ماڭىزدىلىعى» اتتى جيىن ءوتتى. اتالعان شاراعا سەنات دەپۋتاتى، اتالعان جوعارى وقۋ ورنىنىڭ وقىتۋشىلارى مەن بەلسەندى جاستارى قاتىستى.
