بۇگىن ءتۇن ورتاسىندا رەفەرەندۋمعا قاتىستى ۇگىت اياقتالادى

بۇل تۋرالى ق ر ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ ايتتى، دەپ حابارلايدى قازاقپارات ءتىلشىسى.

«بۇگىن ءتۇن ورتاسىندا ۇگىت اياقتالادى. ەرتەڭ، 4-ماۋسىم كۇنى ساعات 00.00-دەن باستاپ بىزدە «تىنىشتىق» كۇنى بولادى. «تىنىشتىق» كۇنى جانە رەفەرەندۋم كۇنى ۇگىتكە بايلانىستى كەز كەلگەن ارەكەتكە تىيىم سالىنادى. ول ءۇشىن زاڭمەن قۇقىقتىق جاۋاپكەرشىلىك قاراستىرىلعان. وسىنى ەسكەرۋدى سۇرايمىز»، - دەدى نۇرلان ءابدىروۆ ورتالىق سايلاۋ كوميسسياسىنىڭ وتىرىسىندا. ق ر باس پروكۋرورىنىڭ ورىنباسارى بولات دەمبايەۆ تا رەفەرەندۋم الدىنداعى كۇنى جانە داۋىس بەرۋ كۇنىندە ۇگىت- ناسيحات جۇرگىزۋگە تىيىم سالىناتىنىن ەسكەرتكەن ەدى.

«بيىلعى 5-ماۋسىمدا كونستيتۋتسياعا وزگەرىستەر مەن تولىقتىرۋلاردى قابىلداۋ ماسەلەسى بويىنشا رەسپۋبليكالىق رەفەرەندۋم وتكىزىلەدى. ەرتەڭ، 4-ماۋسىمدا ساعات 00:00-دە رەفەرەندۋم الدىنداعى ۇگىت- ناسيحات جۇرگىزۋ اياقتالادى («رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ 7-بابىنىڭ 4-تارماعى). بۇل ۇگىت-ناسيحاتقا، سونىڭ ىشىندە قوعامدىق پىكىرگە ساۋالناما جۇرگىزۋ ناتيجەلەرىن نەمەسە رەفەرەندۋم ناتيجەلەرىنىڭ بولجامدارىن جاريالاۋعا قاتىستى مالىمەتتەرگە رەفەرەندۋم وتكىزىلەتىن كۇننىڭ الدىنداعى كۇنى جانە ول وتكىزىلەتىن كۇنى، ياعني 4 جانە 5 -ماۋسىمدا تىيىم سالىنادى»، - دەلىنگەن ب. دەمبايەۆتىڭ ۇندەۋىندە.

ال اقپارات جانە قوعامدىق دامۋ مينيسترلىگى «ۇگىت» ۇعىمىنىڭ ءمانىن جانە مازمۇنىن نەگىزگە الا وتىرىپ، رەفەرەندۋمعا شىعارىلعان سۇراققا سايلاۋشىلاردى «كەلىسەمىن» نەمەسە «قارسىمىن» دەپ داۋىس بەرۋگە تۇرتكى بولاتىن ماتەريالدار ۇگىت ماتەريالدارى رەتىندە قاراستىرىلاتىنىن ەسكەرتەدى. بۇل رەتتە، اتالعان بۇزۋشىلىققا جول بەرگەن جەكە تۇلعالار دا، زاڭدى تۇلعالار دا، سونىڭ ىشىندە الەۋمەتتىك جەلىلەردى پايدالانۋشىلار دا اكىمشىلىك جاۋاپكەرشىلىككە تارتىلۋى مۇمكىن. ينتەرنەت- رەسۋرستاردا بۇرىن جاريالانعان ۇگىت ماتەريالدار باستاپقى ورىندارىندا ساقتالۋىنا جول بەرىلەدى، ولاردى سايتتىڭ باستى بەتىندە شىعارۋعا تىيىم سالىنادى.

اۆتور: مارلان جيەمباي