وتىرعىزىلعان سەكسەۋىلدى مال جاپپاي جەپ جاتىر - ارالدى قۇتقارۋ حالىقارالىق قورى

«سوڭعى جىلدارى مال جايۋدا ءتيىستى ەرەجەلەردى ساقتاماۋدىڭ سالدارىنان اۋىلدىق ەلدى مەكەندەردىڭ اينالاسىنداعى جەرلەردىڭ توزۋى ءجيى بايقالادى. ارال تەڭىزىندەگى جاسىل بەلدەۋگە وتىرعىزىلعان سەكسەۋىل جانە باسقا دا اعاشتاردى جاقىن ماڭداعى ەلدى مەكەندەردىڭ ءۇي مالى جاپپاي جەپ جاتىر»، - دەدى ارالدى قۇتقارۋ حالىقارالىق قورى ديرەكتورىنىڭ ورىنباسارى مارات ناربايەۆ حالىقارالىق ەكولوگيالىق كونگرەسىندە.

ونىڭ ايتۋىنشا، ارال تەڭىزىن قايتا قالپىنا كەلتىرۋدە سۋ رەسۋرسىمەن قاتار كوگالداندىرۋ دا ماڭىزدى. «جوعارىدا ايتىلعان پروبلەماعا بايلانىستى فيتومەليوراتسيا جانە شالعايداعى جايىلىم اينالىمىن قالپىنا كەلتىرۋ جونىندەگى جۇمىستى جانداندىرۋ كەرەك. سونداي- اق كليماتتىڭ وزگەرۋىنىڭ جاھاندىق پروتسەسىن ەسكەرە وتىرىپ، مال شارۋاشىلىعى كلاستەرىن دامىتۋ قاجەت. بۇگىندە ەلىمىزدە شامامەن 187 ميلليون گ ا جەردى قۇرايتىن جايىلىمدىق جەر بار»، - دەيدى ول.

ەسكە سالا كەتەيىك، ارال تەڭىزىنىڭ تارتىلىپ قالعان جەرلەرىن كوگالداندىرۋ ماقساتىندا بيىل كوكتەمدە 3 ميلليون 600 مىڭ ءتۇپ سەكسەۋىل كوشەتى وتىرعىزىلدى. سونداي- اق جىل بويى ارال تەڭىزى تۇبىندە 250 مىڭ گا جەرگە سەكسەۋىل وتىرعىزىلماق. بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى حابارلاعان ەدى.

اۆتور: ءالي يبرايەۆ