فرانسيادا فۋتبول ويىنىنان وت شىقتى

رەسمي پاريج ليۆەرپۋل - رەال كەزدەسۋىن ۇيىمداستىرۋدا جىبەرىلگەن كەمشىلىكتەر ەندى قايتالانبايدى دەپ ۋادە بەرىپ الەك. بىردەن بىرنەشە تەرگەۋ امالدارى باستالدى. سونداي- اق فرانسيا پارلامەنتىندەگى تىڭداۋ كەزىندە تارتىپسىزدىكتەردەن زارداپ شەككەندەرگە وتەماقى تولەۋ جانە بيلەت ساتۋدا جاڭا تەحنولوگيا ەنگىزۋ ماسەلەسى ايتىلدى.

فرانسۋز سەناتورلارى ەلدىڭ ىشكى ىستەر جانە سپورت مينيسترلەرىنىڭ ەكى اياعىن ءبىر ەتىككە تىقتى. چەمپيوندار ليگاسىندا ستاديونعا كىرە الماعان مىڭداعان جانكۇيەر زارداپ شەكتى، ماتچ سوڭى جاپپاي تارتىپسىزدىككە ۇلاسىپ، مەملەكەت اتىنا كىر كەلدى. باس پوليتسەي شەرۋگە شىققان كولىك قىزمەتكەرلەرىن كىنالايدى. سولاردىڭ كەسىرىنەن ستاديون جاقتا كوپ ادام جينالعان. بۇداپ باسقا، بيلەتتەردى قولدان جاساعان الاياقتار قاپتاپ كەتكەن. جالعان بيلەت العاندار كىرىپ، زاڭدى بيلەت العان 2 جارىم مىڭنان استام جانكۇيەر دالادا قالعان.

امەلي ۋدەا- كاستەرا، فرانسيانىڭ سپورت ءمينيسترى:

- ءبىرىنشى كەزەكتە ايتارىمىز، ليۆەرپۋلدىڭ 2700 جانكۇيەرىنە وتەماقى تولەنەدى. ءبىز ۋ ە ف ا- عا ءار ادامعا تولەمدى تەز ارادا جاساۋ تۋرالى ءوتىنىش ايتتىق. پروكۋراتۋرا جالعان بيلەت جاساعان الاياقتارعا قاتىستى تەرگەۋ ءىسىن باستادى. زارداپ شەككەن جانكۇيەرلەردەن ارىز جيناۋ ءۇشىن فرانسۋز پوليتسەيلەرى انگليا مەن يسپانياعا اتتانادى. ۋ ە ف ا دا ءوز الدىنا تەرگەۋ جۇرگىزەدى.

كوزدەن جاس اعىزاتىن گاز قولدانۋ فاكتىسى دە تەكسەرىلەدى. بۇل شەشىمدى فرانسيانىڭ ىشكى ىستەر ءمينيسترى اقتاپ وتىر.

جەرالد دارمانان، فرانسيانىڭ ىشكى ىستەر ءمينيسترى:

- قاراقۇرىم ادامدى قالاي تىقسىرۋعا بولاتىنىن بىلمەدىك. ونىڭ ۇستىنە، زاڭدى بيلەتى بارلاردى انىقتاۋ كەرەك بولدى. ءبىرىنشى كىرەبەرىس ماڭىندا 15 مىڭنان استام ادام بولعان. ولار ىشتەگىلەردى يتەرىپ، قىسىم جاسادى. بىزدە كوزدەن جاس اعىزاتىن گازدى قولدانۋدان باسقا امال بولعان جوق.

جالعان بيلەت تاراتۋعا قاعاز قۇجاتتاردىڭ قولدانىلۋى قولايلى جاعداي تۋدىرعان. رەگبيدەن الەم چەمپيوناتى مەن وليمپيادا ويىندارىن وتكىزۋگە دايىندالىپ جاتقان ەل بيلىگى الداعى ەد شيراننىڭ كونسەرتىندە بلوكچەين تەحنولوگياسى ارقىلى ەلەكترون بيلەت ساتىپ، تاجىريبە جاساپ كورەتىنىن مالىمدەدى.

www.24.kz