باتىس قازاقستاندا ءتورت ادامدى جاراقاتتاعان قاسقىر قۇتىرعان بولىپ شىقتى

ورال. قازاقپارات - باتىس قازاقستان وبلىسىندا ءتورت ادامدى جاراقاتتاعان قاسقىر قۇتىرعان بولىپ شىقتى، دەپ حابارلايدى قازاقپارات ءتىلشىسى.

شىڭعىرلاۋ اۋدانىنىڭ اكىمى ءاليا مۇحانبەتجانوۆانىڭ ايتۋىنشا، وقيعا 7 - مامىر كۇنى شىڭعىرلاۋ اۋىلدىق وكرۋگىنە قاراستى شوقتىباي اۋىلىندا بولعان ەدى.

«قاسقىردىڭ باسىن زەرتتەۋ قورىتىندىسى ونىڭ قۇتىرۋعا شالدىققاندىعىن كورسەتتى. قازىرگى كەزدە شوقتىباي ەلدى مەكەنىندە 60 كۇنگە شەكتەۋ قويىلدى. بارلىق ءۇي جانۋارلارى ەگىلىپ، اۋلالارعا دەزينفەكسيا جۇمىستارى جۇرگىزىلەدى. شوقتىبايدا بارلىعى 69 اۋلا بار، 273 تۇرعىن تۇرادى. قاسقىردىڭ ءتىسى ءتيىپ، جاراقات العان تۇرعىندار ەمىن جالعاستىرۋدا»، دەدى قازاقپارات تىلشىسىنە ءا. مۇحانبەتجانوۆا.

ەسكە سالا كەتەيىك، بۇدان بۇرىن باتىس قازاقستاندا ءتورت ادامعا قاسقىر شاپقانىن جازعان بولاتىنبىز.

اۆتور: ەلجان ەرالى