مينيستر مايمىل شەشەگى تۋرالى - قازاقستانعا كەلگەندەردىڭ دەنە قىزۋى ولشەنەدى
«بۇل ۆيرۋستىق جۇقپالى اۋرۋ، الەمدە سيرەك كەزدەسەدى. نەگىزىنەن ەندەميالىق اۋداندار مەن ايماقتاردا بولادى. بۇل اۋرۋ باتىس افريكادان تارالىپ جاتىر، كوبىنەسە كونگو، نيگەريادا كوپ تىركەلۋدە. شارالار قابىلدانعانىنا قاراماستان، اۋرۋ بۇكىل الەمگە تارادى. قازىرگى ۋاقىتتا 24 ەل وسى ىندەتتىڭ انىقتالعانىن حابارلادى. ءبىراق نەگىزىنەن ۇلى بريتانيا، پورتۋگاليا، يسپانيا ەلدەرىندە تىركەلگەن. دۇنيەجۇزىلىك دەنساۋلىق ساقتاۋ ۇيىمى ءتيىستى ۇسىنىمدارىن بەرىپ جاتىر»، - دەدى اجار عينيات ۇكىمەتتە تىلشىلەرگە بەرگەن سۇحباتىندا.
مينيستر قازاقستاندا مايمىل شەشەگىنىڭ ەش تىركەلمەگەنىن ايتتى.
«اۋرۋدىڭ نەگىزگى بەلگىلەرى - دەنە قىزۋى، ينتوكسيكاتسيا، السىزدىك، باس اۋرۋى، تەرىنىڭ ءبورتۋى. دۇنيەجۇزىلىك دەنساۋلىق ساقتاۋ ۇيىمى بۇكىل الەم بويىنشا وسى بەلگىلەر بايقالعانداردى وقشاۋلاۋعا جانە تەكسەرۋگە كەڭەس بەرەدى. بۇگىنگى تاڭدا قازاقستاندا ەش جاعداي تىركەلگەن جوق. شەكارادا ءبىز ەلىمىزگە كەلگەندەردىڭ بارلىعىنا تەرمومەتريا جۇرگىزەمىز. ەگەر دەنە قىزۋى، ءجىتى رەسپيراتورلىق ۆيرۋستىق ينفەكتسيالارى بار ادامدار تابىلسا، بارلىعى ينفەكسيالىق ستاتسيونارلارعا، جەكە پالاتالار مەن بوكستارعا وقشاۋلانادى، سودان كەيىن تەكسەرىلەدى»، - دەپ ءتۇسىندىردى مينيستر.
سونداي-اق، ونىڭ ايتۋىنشا، دەنساۋلىق ساقتاۋ مينيسترلىگى مايمىل شەشەگى بويىنشا ارنايى دياگنوستيكا جانە اۋرۋدى راستايتىن نەمەسە تەرىسكە شىعاراتىن ارنايى تەستتەر ازىرلەگەن.
«حالىقتى ۆاكسينالاۋ بەلگىلى ءبىر جاعدايلاردا، بۇكىل الەمدە نەمەسە ەلدە اۋقىمدى ىندەت بولعان كەزدە جانە بۇل ينفەكتسيا اۋىر زارداپتار مەن ءولىم قاۋپىن تۋدىرسا عانا جۇرگىزىلەدى. بۇگىنگى تاڭدا د د س ۇ ۆاكسينالاۋ قاجەتتىگى تۋرالى ايتقان جوق. 1980-جىلعا دەيىن بۇل اۋرۋ وتە كەڭ تاراعان. ازىرگە قازاقستان حالقىن ۆاكتسينالاۋ ماسەلەسى كوتەرىلگەن جوق، بۇل ۇسىنىمدى د د س ۇ- دان كۇتەتىن بولامىز. مايمىل شەشەگىنە قارسى ۆاكسينا جوق. بۇل ۆيرۋس ءبىزدىڭ ەلدە تابىلسا دا، ءبىزدىڭ مامانداردىڭ جاقسى تاجىريبەسى بار، ولار دايىندالىپ جاتىر»، - دەدى ا. عينيات.
