قاڭتار وقيعاسى كەزىندە ۇرلانعان ەكى مىڭنان استام قارۋ ءالى قىلمىسكەرلەردىڭ قولىندا

بۇل تۋرالى ق ر ءى ءى م تەرگەۋ دەپارتامەنتىنىڭ باستىعى سانجار ءادىلوۆ ايتتى، دەپ حابارلايدى قازاقپارات ءتىلشىسى.

«بۇرىن حابارلانعانداي، جاپپاي تارتىپسىزدىكتەر بارىسىندا قارۋ-جاراق دۇكەندەرىنەن جانە قۇقىق ءتارتىبى ورگاندارىنىڭ اكىمشىلىك عيماراتتارىنان قارۋدىڭ 2900 دان استام بىرلىگى، سونداي-اق 63180 وق-ءدارى ۇرلاندى. ۇرلانعان زاتتاردىڭ ىشىندە 35 گراناتا اتقىش، 8 پۋلەمەت، 268 اۆتومات، 17 ۆينتوۆكا، 594 تاپانشا، 98 ارنايى مىلتىق پەن 239 جاراقاتتايتىن تاپانشا بار. وسىعان بايلانىستى ىشكى ىستەر ورگاندارى ۇرلانعان قارۋدى تابۋ مەن قايتارىپ الۋ بويىنشا بەلسەندى ءىس-شارالاردى جالعاستىرۋدا»، - دەدى سانجار ءادىلوۆ ورتالىق كوممۋنكاتسيالار قىزمەتىندەگى بريفينگىدە.

ونىڭ ايتۋىنشا، پوليتسيا قىزمەتكەرلەرى قىلمىسكەرلەر قارۋدى جاسىرعان 215 تەن استام ورىندى تاپتى. ولاردان قارۋدىڭ 721 بىرلىگى، ونىڭ ىشىندە 2 گراناتا اتقىش، 43 اۆتومات، ءارتۇرلى مىلتىقتىڭ 189 داناسى مەن 11 مىڭنان استام وق-ءدارى، سونداي-اق ارنايى قۇرالدار مەن وپتيكالىق جابدىقتار الىندى.

«ماسەلەن، تاراز قالالىق پوليتسيا باسقارماسىنىڭ قىزمەتكەرلەرى سالىنىپ بىتپەگەن ۇيدە قارۋ ساقتالاتىن جەردى انىقتادى. وندا جامبىل وبلىستىق پوليتسيا دەپارتامەنتىنىڭ عيماراتىنان ۇرلانعان «كالاشنيكوۆ» اۆتوماتى مەن وعان جابدىقتالعان وقجاتارىن، كەسىلگەن اڭشى مىلتىعىن، جاراقاتتايتىن تاپانشانى جانە 200 دەن استام وق تابىلدى. جالپى بۇگىن 1554 قارۋ مەن 39 مىڭنان استام وق-ءدارى تابىلىپ، الىندى. ونىڭ ىشىندە 10 گراناتا اتقىش، 6 پۋلەمەت، 158 اۆتومات، 348 تاپانشا، 113 ارنايى مىلتىق، 216 جاراقاتتايتىن تاپانشا مەن تاعى باسقالار بار»، - دەدى سانجار ءادىلوۆ.

دەپارتامەنت باستىعىنىڭ دەرەگىنشە، جامبىل وبلىستىق پوليتسيا دەپارتامەنتىنىڭ قىزمەتكەرلەرى جەدەل-ىزدەستىرۋ ءىس-شارالارى بارىسىندا 2 جەرگىلىكتى تۇرعىندى انىقتادى. ولار الماتى قالاسىندا ابىلاي حان كوشەسىندەگى «قورعان» دۇكەنىنەن ۇرلانعان «ۆەپر» كەسىلگەن قارۋىنىڭ 2 داناسىن، «كولت» تاپانشاسىن جانە ءارتۇرلى كاليبرلى 61 وقتى ساتپاقشى بولعان كەزدە ۇستالدى. كۇدىكتىلەر ۋاقىتشا ۇستاۋ يزولياتورىنا قامالدى جانە سوتتىڭ سانكتسياسىنان كۇزەتپەن ۇستاۋعا الىندى. سونىمەن بىرگە تۇسىندىرمە جۇمىسىنىڭ ناتيجەسىندە ازاماتتار قارۋدىڭ 147 بىرلىگىن ءوز ەركىمەن تاپسىردى.

«بۇگىنگى تاڭدا قىلمىسكەرلەردىڭ قولىندا اۋقىمدى ارسەنال - ۇرلانعان مۇلىكتىڭ 2 مىڭنان استام بىرلىگى قالىپ وتىر. بۇل دەگەنىمىز - ۇلكەن قاۋىپ. ويتكەنى قىلمىسكەرلەر كەز كەلگەن ۋاقىتتا ونى بەيبىت ازاماتتارعا قارسى پايدالانا الادى. وسى باعىتتاعى جۇمىس جالعاسۋدا جانە مينيسترلىكتىڭ ەرەكشە باقىلۋىندا»، - دەدى ول.