تۋىمىزدى پايدالانۋ ءتارتىبىن قايتا قاراپ، ءتيىستى زاڭدارعا وزگەرتۋ ەنگىزۋگە بولادى - پرەزيدەنت
«ءبىز عىلىمنىڭ ۇلتتىق ەكونوميكاعا قوساتىن ۇلەسىن كوبەيتۋىمىز كەرەك. سونىمەن بىرگە، الەمدىك عىلىمي كەڭىستىكپەن ىقپالداستىقتى كۇشەيتكەن ءجون. عالىمدار ەلىمىزدىڭ رۋحاني دامۋىنا دا باسا ءمان بەرگەنى دۇرىس»، - دەدى ق ر پرەزيدەنتى.
سونداي- اق، قاسىم- جومارت توقايەۆ مەملەكەتتىك تۋىمىزدى پايدالانۋ ءتارتىبىن قايتا قاراپ، ءتيىستى زاڭدارعا وزگەرتۋلەر ەنگىزۋگە بولاتىنىن ايتتى.
«جاستاردىڭ وتانشىلدىق رۋحىن كۇشەيتۋ كەرەك. قازىر الەۋمەتتىك جەلىدە مەملەكەتتىك تۋدى قادىرلەۋ تۋرالى كوپتەگەن وي- پىكىرلەر ايتىلۋدا. وكىنىشكە قاراي، قاسيەتتى كوك تۋىمىزعا بايلانىستى ورىن العان جاعىمسىز جاعدايلار ازايماي تۇر. سوندىقتان، بايراعىمىزدى پايدالانۋ ءتارتىبىن قايتا قاراۋ كەرەك دەپ ويلايمىن. قاجەت بولسا، ءتيىستى زاڭدارعا وزگەرتۋلەر ەنگىزۋگە بولادى. ويتكەنى، كوك تۋىمىز - قاستەرلى تاۋەلسىزدىگىمىزدىڭ سيمۆولى.
«تۋعان جەرگە تۋىڭدى تىك» دەپ حالقىمىز بەكەر ايتپاعان. ءبىز - تۋىن ءارقاشان بيىك ۇستاعان ەلمىز. وسى رەتتە، قانىش ساتبايەۆتىڭ ءبىر ويى وزەكتى بولىپ وتىرعان سياقتى: «ءوز ەلىنىڭ قارا تاسىن ماقتان ەتە الماعان، وزگە جەردىڭ التىنىن دا ماقتاپ جارىتپاق ەمەس» .
مەملەكەتتىك رامىزدەرىمىزدى قاستەرلەۋ - ءار ازاماتتىڭ پەرزەنتتىك پارىزى. وسىنى وسكەلەڭ ۇرپاقتىڭ ساناسىنا سىڭىرەتىن ەڭ اۋەلى - سىزدەر، ياعني زيالى قاۋىم»، - دەدى مەملەكەت باسشىسى.
