تىرىسقاق اۋرۋىنىڭ ورشىگەنى تۋرالى اقپارات جالعان بوپ شىقتى

«الەۋمەتتىك جەلىلەردە تارالعان رەسەيدە تىرىسقاق اۋرۋىنىڭ ورشىگەنى جانە سۋدىڭ لاستانعانى تۋرالى اقپارات شىندىققا جاتپايدى. 2022-جىلى قازاقستان رەسپۋبليكاسىندا تىرىسقاق بويىنشا ەپيدەميولوگيالىق جاعداي تۋىنداعان جوق. سوڭعى 10 جىل ىشىندە جەرگىلىكتى جەردەن تىرىسقاق اۋرۋى شىققان جوق. ونى سىرتتان جۇقتىرۋ جاعدايلارى تىركەلىپ تۇرادى. ماسەلەن، 2017 جانە 2018-جىلدارى 5 تۋريستەن جانە 2019-جىلى ءۇندىستاننان كەلگەن 4 قازاقستاندىق تۋريستەن تىرىسقاق دەرتى انىقتالدى. 2020-2022-جىلدارى تىرىسقاقتى سىرتتان جۇقتىرۋ جاعدايى تىركەلگەن جوق» دەلىنگەن حابارلامادا.

قازاقستان رەسپۋبليكاسىنىڭ اۋماعىندا حالىقتىڭ سانيتاريالىق-ەپيدەميولوگيالىق سالاماتتىلىعىن قامتاماسىز ەتۋ جانە ەلگە تىرىسقاقتىڭ اكەلىنۋىنىڭ جانە ودان ءارى تارالۋىنىڭ الدىن الۋ ماقساتىندا سانيتاريالىق-ەپيدەميولوگيالىق كوميتەتى مەن ونىڭ اۋماقتىق بولىمشەلەرى (عىلىمي ورتالىقتار، دەپارتامەنتتەر، وباعا قارسى كۇرەس ستانتسيالارى) تىرىسقاقتىڭ جانە باسقا دا ىشەك ينفەكسيالارىنىڭ جۇعۋ جولدارى مەن فاكتورلارىن ەسكەرە وتىرىپ، تۇراقتى ەپيدەميولوگيالىق باقىلاۋ جۇرگىزەدى.

جىل سايىن ەپيدەميالىق ماۋسىمدا سىرتقى ورتا وبەكتىلەرىنە (وزەن، سۋ قويمالارى، رەكرەاتسيا ايماقتارى) تۇراقتى باقىلاۋ جاسالادى.

جىل سايىن اۋىز سۋدىڭ 9 مىڭعا دەيىن، ورتالىقتاندىرىلعان شارۋاشىلىق-اۋىز سۋمەن جابدىقتاۋ سۋىنىڭ 2 مىڭعا دەيىن سىناماسى، ۇيىمداستىرىلعان جاپپاي رەكرەاتسيالىق سۋ پايدالانۋ ورىندارىنداعى سۋ (دەمالىس ايماقتارى، باسسەيندەر، فونتاندار، اكۆاپاركتەر)، سونداي-اق تىرىسقاق بويىنشا ەپيدەميولوگيالىق ءمانى بار جەرلەردەگى سۋدىڭ 6 مىڭعا دەيىن سىناماسى زەرتتەلەدى.