ەكى ادامدى ورتتەن قۇتقارعان سەمەيلىك وقيعانىڭ قالاي بولعانىن ايتىپ بەردى

وسىعان دەيىن سەمەي تۇرعىنىنىڭ 2 ادامدى ورتتەن قۇتقارىپ قالعانىن حابارلاعان ەدىك. قالاداعى فيزيكا- ماتەماتيكا باعىتىنداعى نازاربايەۆ زياتكەرلىك مەكتەبى ديرەكتورىنىڭ قارجى- شارۋاشىلىق ءىسى جونىندەگى ورىنباسارى بولىپ جۇمىس ىستەيتىن بەيبىت كۇننىڭ باتىرى سول ءبىر سىن ساعاتتى ەسىنە الدى.

وقيعا جەكسەنبى كۇنى تاڭعى ساعات 4 پەن 5 تىڭ اراسىندا بولعان.

«سەنبى كۇنى ءتۇن ورتاسىنان اۋا كوپشىلىك كۇتكەن فۋتبولدان چەمپيوندار ليگاسىنىڭ فينالدىق ويىنى ءوتتى. سول ماتچ اياقتالىسىمەن دالاعا شىققانمىن. ۇيىمە جاقىن جەردە ءدامحانانىڭ ورتەنىپ جاتقانىن بايقاپ، لەزدە ءورت سوندىرۋشىلەرگە حابارلادىم. ءوزىم دە بىردەن سول جاققا قاراي جۇگىردىم. كەلە سالا بارلىق ەسىك، تەرەزەلەردى قاقتىم. العاشىندا تىرپ ەتكەن جان بايقالماعانىمەن، عيماراتتىڭ اپاتتىق ەسىگىن سوڭعى كۇشىن سالىپ ارەز اشقان ءبىر ازاماتتى كوردىم. ەسىكتى اشا سالا كوك ءتۇتىننىڭ كەسىرىنەن ەسىنەن تانا بەردى. ونى باسپالداق ارقىلى تومەنگە الىپ ءتۇسىپ، العاشقى كومەك كورسەتتىم. ەسىن جيىسىمەن ىشتە تاعى ءبىر ادامنىڭ قالعانىن ايتتى. ەندى ىشكە بىردەن كىرۋ مۇمكىن ەمەس بولىپ كەتىپتى. جالىن كۇشەيىپ، ءورتتىڭ اۋماعى كەڭەيىپ بارادى. ىشكە كىرگەنىممەن، ءوزىم تۇنشىعا باستادىم. قايتا دالاعا شىعىپ، ءدامحانانى اينالا جۇگىردىم. ايتەۋىر تەرەزەنى كىرپىشپەن سىندىرىپ، ەكىنشى ادامدى الىپ شىقتىم»، - دەيدى داۋرەن جامبايەۆ.

ءوز سوزىندە ول ناعىز ەرلىكتى ءورت سوندىرۋشىلەردىڭ اتقارعانىن اتاپ ءوتتى. قۇتقارۋشىلار قىزىل جالىنعا قاراماستان، ءدامحانا ىشىنەن 4 گاز باللونىن الىپ شىققان.

ايتا كەتەيىك، ەكى ادامدى ورتتەن قۇتقارعان سەمەيلىك 5 بالا تاربيەلەپ وتىر.

اۆتور: تالعاتجان مۇحامەتبەك ۇلى