زاڭداردىڭ سەناتتا قارالۋ ۋاقىتىن قىسقارتىپ، وڭىرلەردىڭ مۇددەسىنە نەگىزگى باسىمدىق بەرەمىز - ماۋلەن اشىمبايەۆ
«ءبىز كونستيتۋتسيالىق وزگەرىستەردەن كەيىن پالاتانىڭ جۇمىسىن ءارى قاراي جاڭعىرتۋ ماسەلەسىمەن دە اينالىسامىز. مىسالى، زاڭداردى قاراۋ ۋاقىتىن قىسقارتۋ كەرەك. كەيبىر زاڭداردى جىلدام قاراۋ كەرەك. كەيبىر كەرەك جوق ساتىلاردى ازايتامىز. مۇنىڭ ءبارى الداعى جۇمىستار. ول جۇمىستاردىڭ ناقتى ناتيجەسى زاڭداردى قاراۋ ۋاقىتى قىسقارعانىمەن، ساپاسىنا كوپ كوڭىل بولىنەدى. بۇل دا وسى رەفورمالاردىڭ ناقتى ناتيجەسىنىڭ ءبىرى دەپ قاراۋ كەرەك»، - دەدى ماۋلەن اشىمبايەۆ ق ر پرەزيدەنت تەلەراديوكەشەنىنە بەرگەن سۇحباتىندا.
ونىڭ ايتۋىنشا، ۇسىنىلىپ وتىرعان كونستيتۋتسيالىق رەفورمادا سەناتقا بىرنەشە جاڭا قۇزىرەت بەرىلمەكشى.
«كونستيتۋتسيالىق سوتتىڭ ءتوراعاسىن پرەزيدەنتتىڭ تاعايىنداۋىنا كەلىسىم بەرۋ قۇزىرەتى بار. سونداي-اق، جوعارعى سوت كەڭەسىنىڭ ءتوراعاسىن تاعايىنداۋعا دا پرەزيدەنتكە كەلىسىم بەرۋ سەناتقا جۇكتەلەدى. بۇلار - سەناتتىڭ وسى باعىتتاعى قۇزىرەتىن ارتتىراتىن شەشىمدەر. جالپى وسى رەفورمانىڭ اياسىندا سەناتتىڭ ءرولى دە ارتادى، جاڭا قۇزىرەتتەر بەرىلىپ، ءارى قاراي سەنات وڭىرلەردىڭ مۇددەسىن جۇرگىزەتىن نەگىزگى ينستيتۋت بولادى دەپ اۋىز تولتىرىپ ايتا الامىز»، - دەدى سەنات سپيكەرى.
