العاشقى مەترونىڭ قايدا پايدا بولعانىن بىلەسىز بە؟

اتالعان كولىك تۇرىمەن كۇنىنە قانشا ادام جۇمىسىنا بارىپ، ۇيىنە قايتادى. ال العاشقى مەتروپوليتەننىڭ قايدا پايدا بولعانىن بىلەسىز بە؟

العاش مەترو لوندون قالاسىندا پايدا بولدى. ⅩⅨ عاسىردىڭ ورتاسىندا لوندون قالاسىنىڭ جەرگىلىكتى حالىق سانى ەكى ميلليونعا جەتىپ، ءبىر جەردەن ەكىنشى جەرگە جەتۋ مۇڭ بولدى.

1855-جىلى قالانىڭ بيلىك وكىلدەرى جەر استى ارقىلى پويىز جول سالۋدى كوزدەدى. وسى باعىتتا MetropolitanRailwaj كومپانياسى جۇمىس ىستەدى.

ايتا كەتۋ كەرەك، مەترونىڭ سالىنۋى اعىلشىنداردىڭ استاناسىنا ۇلكەن وزگەرىس الىپ كەلدى.

العاش سالىنعان مەترونىڭ ۇزىندىعى 3600 مەتر بولعان. ول سونىمەن قاتار جەتى بەكىتتەن تۇرعان. العاشقى مەترونىڭ اشىلۋ سالتاناتى 1863-جىلى 10- قاڭتاردا جۇزەگە استى. سول كەزدەگى كوزگە ەرەكشە كورىنەتىن كولىك ءتۇرىن ۋەلس حانزاداسى، بولاشاق ۇلى بريتانيانىڭ پاتشاسى ەدۋارد Ⅶ اشتى. تەك اشىپ قانا قويعان جوق، ول جاڭا عانا اشىلعان مەترونىڭ ەڭ ءبىرىنشى جولاۋشىسى بولدى.

سول كەزدەگى جەر استى جولىنىڭ ەرەكشەلىگى نەدە بولدى؟

اسا ءبىر ۇلكەن ەرەكشەلىككە يە بولا الدى دەي المايمىز. ويتكەنى تەحنولوگيا قازىرگىدەي دامىماعاندىقتان جەردىڭ استىندا تىنىس الۋ قيىنعا سوققان. كەي ادامدار دەمىكپە اۋرۋىنا دا شالدىققان.

ءتىپتى جۇمىسقا بارۋشى ادامداردىڭ اق كيىمدەرى قاپ-قارا بولىپ كەتكەن. العاش اشىلعان كۇنى مەتروعا وتىز مىڭعا جۋىق جولاۋشى وتىرعان.

ال ءبىر جىل ىشىندە توعىز ميلليون ادام پايدالانسا، بۇل كورسەتكىش كەلەسى جىلى تاعى ءۇش ميلليونعا وسكەن.

ۋاقىت وتە كەلە مەترونىڭ لوكوموتيۆتەرى ەلەكتر تۇرىنە اۋىسا باستادى. ءبىراق بۇعان وتە ۇزاق ۋاقىت كەتتى.

لوندونداعى مەترو تولىققاندى ەلەكتر جۇيەسىنە 1905-جىلى عانا اۋىستى. ەستەرىڭىزدە بولسا، 1988-جىلدىڭ 7- قىركۇيەگىندە قازاقستاننىڭ مەتروپوليتەن قۇرىلىسى ءوز جۇمىسىن باستاپ، ارادا 23 جىل وتكەننەن كەيىن اشىلعان بولاتىن.

Massaget.kz