سىرتقى قولايسىز جاعدايلارعا شۇعىل ارەكەت ەتۋ كەرەك - قىرعىزستان پرەزيدەنتى

بىشكەك. قازاقپارات - ەۋرازيا ەكونوميكالىق فورۋمىنىڭ پلەنارلىق وتىرىسىندا قىرىعىز پرەزيدەنتى سادىر جاپاروۆ ە ا ە و اياسىندا ىسكە اسىرىلۋى ءتيىس باستى قادامداردى اتادى، دەپ حابارلايدى قازاقپارات ءتىلشىسى.

ايتا كەتەيىك، فورۋمعا بىشكەكتە رەسمي ساپارمەن جۇرگەن قازاقستان پرەزيدەنتى قاسىم-جومارت توقايەۆ قاتىسۋدا.

ال رەسەي، ارمەنيا جانە بەلارۋس باسشىلىعى اتالعان فورۋمعا ونلاين رەجيمدە قوسىلدى.

«كوزبە-كوز كەزدەسۋ مۇمكىن بولماسا دا، زاماناۋي تەحنولوگيالار وسىنداي اۋقىمدى جيىنداردى ونلاين تارتىپتە وتكىزۋگە جول اشىپ وتىر. بىزدە ءوتىپ جاتقان فورۋمعا ەكى مىڭنان استام ادام قاتىستى. اتاپ ايتقاندا، جيىنعا ە ا ە و- عا مۇشە ەلدەرمەن قاتار، الىس شەتەلدەن دە قوناقتار كەلدى»، - دەدى س. جاپاروۆ.

سونىمەن قاتار ول بيىل قىرعىزستان جاعى ءتوراعالىق ەتەتىن مىندەتتەرىنە كىرىسكەنىن ەسكە سالدى.

«وسى ورايدا بيىلعى ماڭىزدى مىندەتتەردى جۇزەگە اسىرۋ بويىنشا باسىمدىقتاردى بەلگىلەۋگە قاتىستى پىكىر ءبىلدىردىم. ءبىزدىڭ باستى ماقسات رەتىندە باستى قاعيداتتار ساقتالىپ وتىر، ياعني تاۋارلار قوزعالىسىنىڭ، ءتۇرلى سالادا قىزمەت كورسەتۋدىڭ، كاپيتال مەن ەڭبەك رەسۋرستارىنىڭ ەركىندىگى ەسكەرىلگەن. ەكىنشىدەن، 2025-جىلعا دەيىن دامۋ ستراتەگياسىن ۋاقىتىلى جۇزەگە اسىرىلۋى ءتيىس. ۇشىنشىدەن، اگروونەركاسىپ پەن ونەركاسىپ سالالارىندا بىرلەسكەن جۇمىستار بار. بۇل تۇرعىدا يمپورتتى الماستىرۋ مەن ە ا ە و- نىڭ ازىق-تۇلىك قاۋىپسىزدىگىن قامتاماسىز ەتۋ ماقساتىندا ناقتى كووپەراتسيالىق جوبالاردى ىسكە قوسۋ قامتىلعان»، - دەدى قىرعىزستان باسشىسى.

سونىمەن قاتار ول تۇراقتى ەكونوميكالىق ءوسىمدى قامتاماسىز ەتۋ باعىتىندا دامۋ باعدارلاماسىنىڭ الگوريتمدەرى مەن تەتىكتەرىن جۇزەگە اسىرۋدىڭ ماڭىزدىلىعىن اتاپ ءوتتى.

س. جاپاروۆ «شىعىس-باتىس» جانە «سولتۇستىك-وڭتۇستىك» باعىتتارى بويىنشا كولىك-لوگيستيكا ينفراقۇرىلىمىن دامىتۋ قادامىنا توقتالا كەلە، بۇل ماقساتتار الەمدىك ساياساتتاعى قۇبىلمالىقتىڭ ۋشىعۋى جاعدايىندا اسا وزەكتى بولىپ تۇرعانىن جەتكىزدى.

«وسى جاعدايدا بىزگە سىرتقى قولايسىز فاكتورلارعا شۇعىل ءارى ءتيىمدى ارەكەت ەتۋ قاجەت بولىپ تۇر»، - دەدى قىرعىزستان پرەزيدەنتى.

بۇعان دەيىن حابارلاعانىمىزداي، قاسىم-جومارت توقايەۆ رەسمي ساپارمەن قىرعىزستانعا باردى.

قىرعىزستان پرەزيدەنتى «اق كەمە» ءمارمار شاتىرىندا قاسىم-جومارت توقايەۆتى رەسمي قارسى الدى.

قازاقستان پرەزيدەنتىنىڭ قىرعىزستانعا ساپارى بارىسىندا ءبىرقاتار قۇجاتقا قول قويىلدى.