تۇركيالىق جانە قازاقستاندىق دارىگەرلەردىڭ ىنتاماقتاستىعى بەكي تۇسپەك

نۇر-سۇلتان.قازاقپارات - ەلوردادا بالالار حيرۋرگتەرىنىڭ شەبەرلىك ساعاتى ءوتىپ جاتىر. وندا انادولى جەرىنەن كەلگەن ماماندار قازاقستاندىق ارىپتەستەرىنە ءتۇرلى اۋرۋدى ەمدەۋ جولدارى مەن تىڭ تاسىلدەرىن كورسەتىپ، تاجىريبە الماسادى.

ءىس- شارا بارىسىندا 9 جەتكىنشەككە وپەراتسيا جاساۋ دا جوسپارلانعان. تۇركيالىق دارىگەرلەر وپەراتسيا جاساعان جەتكىنشەكتەردىڭ ءبىرى - دياس اقىلباي. قازىر ول رەانيماتسيادا ەم قابىلداپ جاتىر. باۋىر ەتى بالاسى ءۇشىن الاڭداعان انانىڭ كوڭىلىن شەتەلدىك ماماننىڭ ءوزى كەلىپ باسىپ، وپەراتسيانىڭ قالاي وتكەنىن بايانداپ بەردى.

ناۋرىزگۇل ماسىعۇتوۆا، اتا- انا:

- باۋىرىندا ەت وسكەن. ونى ۋزي ارقىلى انىقتادىق كوكشەتاۋ قالاسىندا. سوسىن استاناعا جولداما الىپ، وسىندا كەلىپ ەستىدىك ماستەر كلاسس وتەدى دەپ. بارلىعى تەگىن، ءبىزدىڭ مەملەكەتىمىزدىڭ ارقاسى عوي. وسى اۋرۋحانادا بولادى. تولقىپ تۇرمىن. سوزگە شەشەن ەدىم، قازىر ەندى ايتا الماي تۇرمىن. العىس ايتقىم كەلەدى وسى تۇرىك اعايىنداستارىمىزعا، مەملەكەتىمىزگە.

مامىردىڭ 15- كۇنى باستالعان شەبەرلىك سىنىبى اياسىندا تۇركيانىڭ ىستامبۇل قالاسىنان كەلگەن دارىگەرلەر قازاقستاندىق ارىپتەستەرىنە ءتۇرلى اۋرۋلاردى ەمدەۋدىڭ تىڭ ءادىسىن ۇيرەتپەك. ماسەلەن، كۇردەلى وپەراتسيالاردى دەنەنى كەسپەي جاساۋ ءتاسىلى قولدانىلۋدا. لاپاروسكوپيالىق ادىسپەن بۇگىندە 5 بالاعا وپەراتسيا جاسالىپتى.

گۇلنار قۇلىشيەۆا، №2 كوپبەيىندى قالالىق بالالار اۋرۋحاناسىنىڭ ديرەكتورى:

- وسى 2022 -جىل بالالار جىلى دەپ جاريالاندى. وسى جىلدىڭ اياسىندا ءبىزدىڭ №2 كوپبەيىندى قالالىق بالالار اۋرۋحاناسى حالىقارالىق وسىنداي ماستەر كلاسستى ۇيىمداستىرىپ، تاقىرىبى «بالالار حيرۋرگياسى» بولىپ بەلگىلەندى. سەبەبى نەگىزگى ماقساتى - قازاقستاننىڭ تۇكپىر- تۇكپىرىنەن كەلگەن جاس بۇلدىرشىندەرىمىزدىڭ قانداي دا اقاۋلارعا وتا جاساپ، كومەكتەسىپ، ولاردى ەمدەپ، ءارى قاراي جەتكىزۋ. ودان سوڭ وسى ماماندارىمىزدىڭ بىرىكتىرۋ.

شەبەرلىك ساعاتى بارىسىندا تۇركيالىق دارىگەرلەر ونلاين ترانسلياتسيا ارقىلى ءوز بىلگەن- تۇيگەندەرىن بايانداپ، بالالارعا وتا جاساپ، ءىس جۇزىندە دە تاجىريبەلەرىمەن ءبولىستى. مەيماندار قازاقستاندىق ارىپتەستەردەن دە ءبىراز نارسەنى ۇيرەنگەندەرىن ايتادى.

بۋراك تاندەر، ادجيبادەم كلينيكاسىنىڭ بالالار حيرۋرگى: /تۇركيا/

- قازاقستاندا نەيروحيرۋرگيانى دامىتۋدا وسىنداي تاجىريبە الماسۋلار وتە ماڭىزدى. مۇنداي شەبەرلىك سىنىپتارىنىڭ بارىسىندا ءبىز ءوز بىلگەنىمىزدى ۇيرەتسەك، قازاقستاندىق ماماندار ءوز ەمدەۋ جولدارىن بىزگە كورسەتەدى. كەيىن جاڭا ادىستەردى دە ويلاپ تابۋعا بولادى. ماسەلەن، تۇركيادا سيرەك، ءبىراق قازاقستاندا كوپ كەزدەسەتىن دياگنوزدارمەن كەڭ تانىسىپ، ونى ەمدەۋ جولدارىن ۇيرەندىم.

جالپى وسى جولعى شەبەرلىك ساعاتى اياسىندا 9 بالاعا وتا جاساۋ جوسپارلانعان. ال جىل سوڭىنا دەيىن وسىنداي 4 حالىقارالىق شەبەرلىك سىنىبى وتەدى دەپ جوسپارلانىپ وتىر.

www.24.kz