ش ق و- داعى كەلىندەر بايقاۋىندا ءتۇرلى ۇلت وكىلدەرى باق سىنادى
گلۋبوكوە اۋدانىندا ءداستۇرلى «اياۋلى جاس كەلىن» وبلىستىق بايقاۋى ءوتتى. قاتىسۋشىلار قازاقتىڭ سالت- داستۇرلەرىن، ادەت- عۇرىپتارىن بىلۋدەن جانە تاعامدارىن ازىرلەۋدەن سايىسقا ءتۇسىپ، شىعارماشىلىق جانە زياتكەرلىك قابىلەتتەرىن كورسەتتى.
مادەنيەت ءۇيىنىڭ الدى كىشىگىرىم اۋىلعا اينالدى. ءار كيىز ءۇيدىڭ جانىندا شاي قايناتىلىپ، قازاندا جاس كەلىندەر باۋىرساق ءپىسىرىپ، جارىستىڭ كوركىن قىزدىردى. وبلىستىق بايقاۋعا العاشقى رەت قاتىسىپ وتىرعان انجەليكاعا قازاقتىڭ داستۇرىنەن تاڭسىق ەمەس. ول ەكى جىل بۇرىن قازاق وتباسىنىڭ كەلىنى اتانعان.
«وسى ۋاقىت ارالىعىندا وتە كوپ دۇنيەنى ۇيرەندىم. قامىر يلەپ، نان جايىپ، باۋىرساق، شەلپەك ءپىسىرۋ مەن ءۇشىن ۇيرەنشىكتى ءىس. اقيىق اقىن مۇقاعالي ماقاتايەۆتىڭ «ءۇش باقىتىم» اتتى ولەڭىن قازىلار القاسى الدىندا وقىپ بەردىم. بۇگىن مەنىڭ قاسىما جان جولداسىم، 10 ايلىق قىزىم قولداپ كەلىپ وتىر»، - دەيدى وسكەمەن قالاسىنان كەلگەن قاتىسۋشى انجەليكا شابدانبەكوۆا.
بايقاۋعا وبلىستىڭ ءار اۋداندارىنان كەلگەن 16 كەلىن قاتىستى. بايقاۋدىڭ «جاس كەلىننىڭ ءبىر كۇنى» اتتى العاشقى بولىمىندە كەلىندەر ءبىر كۇندىك تىنىس- تىرشىلىگىن كورسەتەتىن بەينەروليك ۇسىندى. ودان كەيىن «اس ادامنىڭ ارقاۋى» كەزەڭىندە ۇمىتىلىپ بارا جاتقان اس تۇرلەرىن ۇسىندى.
ينتەللەكتۋالدىق سايىستا قازاق حالقىنىڭ سالت- ءداستۇرى، ادەت- عۇرپى جايلى ءتۇرلى تاقىرىپتاعى سۇراقتارعا جاۋاپ بەرسە، شىعارماشىلىق كەزەڭ ءوز ونەرلەرىن ورتاعا سالدى. ءبىرى ءان ايتسا، ءبىرى بي بيلەپ، مانەرلەپ ولەڭ وقىدى. ەڭ سوڭعى «اق ورامال» بولىمىندە ءار ۇلت وكىلىنىڭ قاتىسۋشىسى كەلىننىڭ باسىنا بايلايتىن ورامالدىڭ شىعۋ تاريحى، ەرەكشەلىگى، ورامال تاعۋ مادەنيەتى جايلى ەگجەي- تەكجەيلى ايتىپ بەردى.
سايىستىڭ ۇيىمداستىرىلۋىنا مۇرىندىق بولعان ش ق و جاستار رەسۋرستىق ورتالىعىنىڭ ديرەكتورى ارايلىم ەسىمبەكوۆا جىل سايىن قاتىسۋشىلارعا قويىلاتىن تالاپتار كۇشەيتىلىپ كەلە جاتقانىن ايتادى.
«بيىل بايقاۋدىڭ ەرەكشە ءارى قىزىقتى ءوتۋىنىڭ ءبىر سەبەبى ءار جىلدارى تەك قازاق ۇلتىنىڭ قىزدارى قاتىسىپ كەلە جاتقان بايقاۋدىڭ اۋقىمى كەڭەيىپ، باسقا ۇلت وكىلدەرى دە قاتىسۋعا نيەت ءبىلدىردى. دەمەك، ەندى ءبىز باسقا ەتنوستاردىڭ سالت- داستۇرلەرىمەن جانە ەرەكشەلىكتەرىمەن تانىسۋعا مۇمكىندىك الدىق. بۇل شارا وتباسىلىق قۇندىلىقتاردى دارىپتەپ، قوعامداعى انالاردىڭ مارتەبەسىنىڭ ارتۋىنا سەپ بولادى دەپ ويلايمىن»، - دەيدى ارايلىم ەسىمبەكوۆۆ.
سايىس قورىتىندىسىنا سايكەس، «اياۋلى جاس كەلىن» بايقاۋىندا ءۇشىنشى ورىندى وسكەمەن قالاسىنان كەلگەن قاتىسۋشى انجەليكا شابدانبەكوۆا يەلەنسە، ەكىنشى ورىن گلۋبوكوە اۋدانىنىڭ كەلىنى اجار تولەۋقانوۆا مەن ريددەرلىك ارداق مالتايەۆاعا بۇيىردى. باس جۇلدەنى اباي اۋدانىنان كەلگەن ايدانا بايتۋسوۆا جەڭىپ الدى. بايقاۋعا قاتىسۋشىلاردىڭ بارلىعى العىس حاتتارمەن، جۇلدەگەرلەر باعالى سىيلىقتارمەن ماراپاتتالدى.
اۆتور: تالعاتجان مۇحامەتبەك ۇلى