انتيكورعا «بۇرىنعى پرەمەر-مينيستر اسقار مامينگە قاتىستى قىلمىستىق ءىس بار ما؟» دەگەن سۇراق قويىلدى

بۇل تۋرالى ق ر سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى ۇلان سارقۇلوۆ ايتتى، دەپ حابارلايدى قازاقپارات ءتىلشىسى.

ورتالىق كوممۋنيكاتسيلار قىزمەتىندەگى باسپا ءسوز ءماسليحاتىندا ۇلان سارقۇلوۆقا «بۇرىنعى پرەمەر-مينيستر اسقار مامينگە قاتىستى قىلمىستىق ءىس بار ما؟» دەگەن سۇراق قويىلدى.

«باستاپقىدا بارلىق اتىشۋلى ىستەردى ايتىپ وتكەن ەدىك. بىردەن ايتايىن، اسقار مامينگە قاتىستى قازىرگى ۋاقىتتا ءبىزدىڭ اگەنتتىكتە قىلمىستىق ءىس جۇرگىزىلىپ جاتقان جوق»، - دەپ جاۋاپ بەردى ۇ. سارقۇلوۆ.

ايتا كەتەيىك، ەلدەگى قاڭتار وقيعاسىنان كەيىن اسقار مامين ۇكىمەت باسشىسى لاۋازىمىنان بوساتىلعان ەدى. ونىڭ ورنىنا ءاليحان سمايىلوۆ تاعايىندالدى.

اۆتور: ايجان سەرىكجان قىزى