قازاقستاننان تۇركياعا ۇشاتىن اۋە رەيستەرىنىڭ سانى ەكى ەسەگە ارتادى

بۇل تۋرالى انكارادا وتكەن پرەزيدەنتتەر قاسىم-جومارت توقايەۆ پەن رەجەپ ەردوعاننىڭ كەزدەسۋى بارىسىندا ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ مالىمدەدى.

بۇگىندە اۋە قاتىناستارى بويىنشا ۇكىمەتارالىق كەلىسىم نەگىزىندە ەلدەر اراسىنداعى تۇراقتى رەيستەردىڭ جيىلىگى بويىنشا اپتاسىنا 61 جولاۋشىلار رەيسى ورىندالادى. ەندى 13-مامىردان باستاپ ۇشۋ سانى اپتاسىنا 63 رەيسكە ارتپاق. سايكەسىنشە، ەلدەر اراسىنداعى اپتا سايىنعى رەيس سانى 124-كە دەيىن وسەتىن بولادى.

«بيىل 13-مامىرىنان باستاپ انتاليا جانە بودرۋم باعىتتارىندا قاتىنايتىن Air Astana, SCAT، Turkish Airlines اۋە كومپانيالارىنىڭ رەيس سانى بىرتىندەپ ارتاتىن بولادى. قوسىمشا رەيستەر نۇر- سۇلتان، الماتى، اقتاۋ، اقتوبە، اتىراۋ، قاراعاندى، قوستاناي، ورال، شىمكەنت جانە وسكەمەن ارقىلى ىسكە اسىرىلادى»، - دەدى قايىربەك وسكەنبايەۆ.

SCAT انتالياعا اپتاسىنا 29 جاڭا رەيستى نۇر-سۇلتان (اپتاسىنا 7 رەيس)، الماتى (6)، اقتوبە (3)، اتىراۋ (3)، شىمكەنت (2)، قاراعاندى (2)، ورال (2) ، قوستاناي (2)، اقتاۋ (1)، وسكەمەن (1) قالالارىنان جۇزەگە اسىرادى. ال Air Astana نۇر-سۇلتان جانە الماتىدان انتاليا (7 رەيستەن) مەن بودرۋمعا (2 رەيستەن) اپتاسىنا 18 رەيس جاساماق.

Turkish Airlines انتالياعا اپتاسىنا 16 رەيستى نۇر-سۇلتان (5 رەيستەن)، الماتى (4) جانە قاراعاندىدان (3) جانە بودرۋمعا نۇر-سۇلتان (2 رەيستەن) مەن الماتىدان (2) ورىندايدى.

قايىربەك وسكەنبايەۆتىڭ ايتۋىنشا، 2022 -جىلعى مامىردا يندۋستريا جانە ينفراقۇرىلىمدىق دامۋ مينيسترلىگى مەملەكەتتەر اراسىنداعى اۋە تاسىمالىن ودان ارمەن ارتتىرۋ مەن ۇشۋ گەوگرافياسىن كەڭەيتۋ بويىنشا ەكى ەلدىڭ اۋە بيلىگى وكىلدەرىنىڭ كەلىسسوز جۇرگىزۋ ۇسىنعان. باستاما قولداۋ تاۋىپ، كەلىسسوزدەر وسى جىلدىڭ شىلدەسىندە ىستامبۇل قالاسىندا وتەدى.

ەسكە سالايىق، COVID-19 پاندەمياسىنا دەيىن قازاقستان مەن تۇركيا اراسىندا اپتاسىنا 65 اۋە تاسىمالى جۇزەگە اسىرىلعان.