ءار ازامات رەفەرەندۋمدا داۋىسقا سالىناتىن ماسەلەلەردى وقىپ شىعۋى كەرەك - جۋرناليست
«پاۆلودار گەوگرافيا ءۇيى» قوعامدىق بىرلەستىگىنىڭ ديرەكتورى، جۋرناليستەر وداعىنىڭ وبلىستىق قوعامدىق كەڭەسىنىڭ ءتوراعاسى الەكساندر ۆەرۆەكين قازاقستاننىڭ ازاماتتىق اليانسى وتكىزگەن تەلەكوپىردە وسىنداي پايىم ايتتى، دەپ حابارلايدى قازاقپارات ءتىلشىسى.
«27 جىل بۇرىن رەفەرەندۋم ءوتىپ جاتقاندا مەن مەكتەپكە بارىپ ءجۇر ەدىم. مەملەكەت باسشىسى باستاماشى بولىپ وتىرعان وزگەرىستەرگە دايىندىق قىزۋ ءجۇرىپ جاتىر دەپ ايتۋعا بولادى. بۇل رەفورمانى تاريحي وقيعا دەپ اتايتىنىمىز، ءار قاراي سونداعى نورمالار بويىنشا ءومىر سۇرەمىز. وزگەرتىلگەن كونستيتۋتسيانىڭ ومىرشەڭدىگى، ونداعى تالاپتار مەن ەرەجەلەردىڭ ورىندالۋى بىزگە بايلانىستى. بۇل رەفەرەندۋمعا قاتىسساق تا، قاتىسپاساق تا ەرتەڭگى ءومىرىمىزدىڭ ساپاسىنا داۋىس بەرەمىز. ويتكەنى كونستيتۋتسيا ەلىمىزدەگى ەڭ جوعارى تۇرعان زاڭ بولىپ ەسەپتەلەدى»، - دەگەن قوعامدىق ۇيىم باسشىسى قازىر ەلىمىزدە زاڭنىڭ ورىندالۋ دەڭگەيى ماردىمسىز ەكەنىن اتاپ ءوتتى.
«وكىنىشكە قاراي، اتا زاڭىمىز دا، وزگە زاڭدار دا ەلىمىزدە تولىق ورىندالمايدى. جالپى بۇگىنگە دەيىن قابىلدانعان زاڭداردىڭ كوبى جاقسى جازىلعانىمەن، ايقىن ءارى ناقتى تاپسىرلەنگەنىمەن، جۇمىس ىستەۋ جاعى اقساپ جاتىر. سوندا رەفەرەندۋمدا داۋىس بەرۋگە قاتىسامىز با، قالاي داۋىس بەرەمىز دەگەن ماسەلەدەن بولەك، ول كونستيتۋتسيانىڭ قابىلدانۋىن قالاي قاداعالايمىز دەگەن ماسەلە وزەكتىرەك. كونستيتۋتسيادا وزگەرىسسىز قالاتىن جانە وزگەرلىتەتىن پوستۋلاتتاردى قالاي ىسكە اسىرامىز دەگەن ماسەلە بار»، - دەدى الەكساندر ۆەرۆەكين.
ونىڭ سوزىنە قاراعاندا، پاۆلودارلىقتاردىڭ رەفەرەندۋمعا دەگەن قىزىعۋشىلىعى جوعارى جانە ونى سايلاۋلاردىڭ الدىنداعى قىزۆعۋشىلىق دەڭگەيىمەن سالىستىرۋعا كەلمەيدى. ويتكەنى حالىقتىڭ سايلاۋعا دەگەن قىزىعۋشىلىعى مۇنداي بولىپ كورمەگەن ەكەن.
«ب ا ق ارقىلى، الەۋمەتتىك جەلى ارقىلى كوپشىلىك اراسىندا تالقىلانىپ جاتقان ماسەلەلەر بار. اسحانادان باستاپ اۆتوبۋستىڭ ىشىندە دە بۇل ماسەلەلەر تالقىلانىپ جاتىر. مىسالى، مەملەكەت باسشىسى مەن ونىڭ وتباسى مۇشەلەرىنە قاتىستى وزگەرتۋلەر ەلدىڭ نازارىندا. جەر قويناۋىنداعى بايلىقتىڭ تاعدىرى دا ەلدى الاڭداتىپ وتىر. ونى حالىققا ورتاق يگىلىك دەپ بەلگىلەنگەنمەن، سول حالىقتىڭ اتىنان مەملەكەت مەنشىك يەسى رەتىندە شەشىم قابىلداي الادى دەگەن جوبا ۇسىنىلىپ ءجۇر. بۇل ءبىزدىڭ قوعام ءۇشىن وتە ماڭىزدى ماسەلە. ونى جەر رەفورماسى كەزىندە ءبارىمىز كوردىك. قازىر ءاربىر قازاقستاندىق كونستيتۋتسياعا ۇسىنىلىپ وتىرعان وزگەرىستىڭ ءارقايسىسىن جەتە زەرتتەمەسە دە، جوبانى تولىق وقىپ شىعۋى كەرەك. حالىققا وسىنى ايتۋىمىز قاجەت. رەفەرەندۋمعا بارىڭىزدار دەپ ۇگىتتەگەننەن وسى پايدالىراق»، - دەدى قوعام بەلسەندىسى.
رەسمي مالىمەت بويىنشا، بيىل جەر قويناۋىن پايدالانۋشىلارمەن جاسالعان 52 كەلىسىمشارت كۇشىن جويعان.
