ساياسات تانۋشى الداعى رەفەرەندۋمعا ارنالعان سايت اشۋدى ۇسىندى

پايىمىنشا، ول سايتتا اتا زاڭنىڭ بۇرىنعى نۇسقالارى دا بەرىلۋى كەرەك، دەپ حابارلايدى قازاقپارات ءتىلشىسى.

«مەنەن ءبىر تانىسىم قولدانىستاعى كونستيتۋتسيامىزدىڭ ءماتىنىن جىبەرۋىمدى وتىنگەن بولاتىن. ينتەرنەتتەن تاۋىپ جىبەرۋ ءۇشىن 5 مينۋت كەتتى. ءتۇرلى سىلتەمەلەردى اقتاردىم. زاڭعا سىلتەمە بار بولعانىمەن، ول زاڭنىڭ ءوزى جوق دەگەن سياقتى. ارينە، كونستيتۋتسيانىڭ ءوزىن تابۋ قيىن ەمەس. ارنايى سايت بار. ال، كونستيتۋتسياعا ەنگىزىلگەن وزگەرىستەردى تابۋ قيىنداۋ. بۇگىنگى پىكىرتالاس كلۋبىنىڭ اياسىندا ارنايى سايت اشۋدى ۇسىنامىن. ول سايت بۇكىل جەرگە تاراتىلۋى كەرەك»، - دەدى ول «Sarap» ەكسپەرتتىك كلۋبىندا وتكەن دوڭگەلەك ۇستەلدە.

ايتۋىنشا، ول سايتتا كونستۋتسيانىڭ بۇرىنعى نۇسقاسى مەن ۇسىنىلىپ وتىرعان وزگەرتۋلەر قاتار بەرىلۋى كەرەك. حالىق سوعان قاراپ، وزگەرىستەردىڭ ءمانىن تۇسىنۋگە مۇمكىندىك الماق.

«حالىقتىڭ ونلاين رەجيمدە قويىپ جاتقان ساۋالدارىنا كاسىبي زاڭگەرلەر بىلىكتى جاۋاپ بەرۋى كەرەك. سوندا حالىقتىڭ قولى قاجەت اقپاراتقا جەتەدى، رەفەرەندۋم كەزىندە نە ءۇشىن داۋىس بەرەتىندەرىن تۇسىنەدى. پرەزيدەنت ۇسىنعان كونستيتۋتسيالىق رەفورما قوعامدىق كەلىسىمنىڭ جاڭا شەڭبەرىن، جاڭا ويىن ەرەجەسىن ايقىندايدى. كونستيتۋتسيالىق ءتارتىپ ادەتتە بيلىكتىڭ باسسىزدىعىنا جول بەرمەيدى جانە ول ءتارتىپتى كونستيتۋتسيالىق سوت كۇزەتەدى. وزگەرىستەردە وسى كونستيتۋتسيالىق سوتتى قالپىنا كەلتىرۋ كوزدەلگەن»، - دەدى ساراپشى.

بۇعان دەيىن ق ر پرەزيدەنتى قاسىم-جومارت توقايەۆ كونستيتۋتسياعا وزگەرىستەر مەن تولىقتىرۋلار ەنگىزۋ ماسەلەلەرىنە قاتىستى بەينەۇندەۋىندە كونستيتۋتسيالىق سوتتىڭ قۇرىلاتىنىن راستاعان ەدى.