دەپۋتاتتار ونلاين- كرەديت بەرۋگە تىيىم سالۋدى ۇسىندى

ميكروقارجى ۇيىمدارىنىڭ پورتفەلىندەگى پروبلەمالىق قارىزدار كولەمى 914 مىڭدى نەمەسە جارتىسىنان استامىن قۇرايدى. بۇل تۋرالى ءماجىلىس دەپۋتاتى ءدانيا ەسپايەۆا ايتتى، دەپ حابارلايدى قازاقپارات ءتىلشىسى.

دەپۋتات بۇگىن ماجىلىستە «جەكە تۇلعالاردىڭ بانكروتتىعى تۋرالى» زاڭ جوباسىن قاراستىرۋدى باستاعانىن ەسكە سالدى.

«بانكروتتىق - ماسەلەنىڭ سالدارى ەكەنىن ەستە ۇستاعان ءجون، ال ونىڭ سەبەبى باسقادا جاتىر. حالىق تابىسىنىڭ تومەن بولۋى، پايىزدىق مولشەرلەمەلەردىڭ شامادان تىس جوعارى بولۋى جانە جەكە تۇلعالارعا نەسيەنىڭ تىم قولجەتىمدى بولۋى بانكروتتىققا اكەپ سوعادى. حالىقتىڭ نەگىزگى بولىگىنىڭ تابىسىنىڭ تومەندىگى ولاردى باسپانانى جالعا الۋ، بالالاردى وقىتۋ، باسقا بانكتە اي سايىن نەسيە تولەۋ، ازىق- تۇلىك جانە باسقا دا قاجەتتىلىكتەر ءۇشىن ونلاين- قارىز الۋعا ءماجبۇر ەتەدى. كەپىلسىز قارىز تەز جانە تابىس دەڭگەيىن ەسكەرمەي بەرىلۋى، جوعارى پايىزدىق مولشەرلەمە تۇرىندەگى سىن- قاتەر حالىقتىڭ جاپپاي كرەديتتەلۋىنە ىقپال ەتەدى»، - دەدى د. ەسپايەۆا ءماجىلىستىڭ جالپى وتىرىسىندا.

ونىڭ ايتۋىنشا، «اق جول» فراكسياسىنىڭ دەپۋتاتتارى ميكروكرەديتتەر بويىنشا جىلدىق ءتيىمدى سىياقى مولشەرلەمەسىن جىلدىق %56 دان اسپايتىن سوما مەن مەرزىمگە شەكتەۋسىز بەلگىلەۋدى ۇسىنعان. قارجى نارىعىن باقىلاۋ مەن رەتتەۋ اگەنتتىگى بۇل باستامانى قولداعان. سونداي- اق، د. ەسپايەۆا فراكتسيانىڭ «ميكروقارجى قىزمەتى تۋرالى» زاڭعا ميكروكرەديت بويىنشا ارتىق تولەمنىڭ شەكتى مولشەرىن ەكى ەسەگە - ميكروكرەديت سوماسىنىڭ %100 ىنان %50 ىنا دەيىن تومەندەتۋ بويىنشا تۇزەتۋلەرگە قول جەتكىزگەنىن ايتتى. ءماجىلىس دەپۋتاتىنىڭ ايتۋىنشا، حالىقتىڭ قارىز تۇزاعىنا ءتۇسۋىنىڭ نەگىزگى سەبەبى - جوعارى پايىزدار بولىپ وتىر، سونىڭ سالدارىنان ولار ءوز مۇلكىنەن، سونىڭ ىشىندە جالعىز باسپاناسىنان ايىرىلۋى مۇمكىن.

«ميكروقارجى ۇيىمدارىنداعى پروبلەمالىق قارىز ۇلەسى جىل سايىن ءوسىپ كەلەدى. 2022 -جىلعى ناۋرىزداعى جاعداي بويىنشا 1212 مىڭ قارىزدىڭ 435 مىڭى پروبلەمالىق بولعان. مەرزىمى وتكەن قارىزدار - 479 مىڭ قارىز الۋشى نەمەسە جارتىسىنان استامى كوللەكتورلىق كومپانيالارعا ساتىلدى. وسىلايشا، ميكروقارجى ۇيىمدارىنىڭ پورتفەلىندەگى پروبلەمالىق قارىزداردىڭ جالپى سانى 914 مىڭ نەمەسە جارتىسىنان استامىن قۇرايدى. قازىر ۇلتتىق ەكونوميكانى نەسيەلەندىرۋدى قىسقارتۋ، جۇمىس ورىندارى مەن حالىق تابىسىنىڭ ءوسۋىن تەجەۋ ءجۇرىپ جاتىر. جەڭىل بولىپ كورىنەتىن ينتەرنەتتەگى نەسيە بەرۋدىڭ ايلا- امالدارى دا ادامداردى قۇلدىققا يتەرمەلەۋدە. بۇل «جەكە تۇلعالاردىڭ بانكروتتىعى تۋرالى» زاڭنىڭ قابىلدانۋىن قاجەت ەتتى»، - دەدى ءدانيا ەسپايەۆا. وسىعان بايلانىستى «اق جول» فراكتياسىنىڭ دەپۋتاتتارى ونلاين- كرەديتتەۋگە تىيىم سالۋدى ۇسىندى.

اۆتور: ايجان سەرىكجان قىزى