سەنات سپيكەرى مايدانداعى قازاقستاندىقتاردىڭ باتىرلىعىن ۇمىتپاۋعا شاقىردى

سپيكەر اتاپ وتكەندەي، قازاقستان دالاسىنان مايدانعا 1 ميلليون 360 مىڭنان استام قازاقستاندىق اتتاندى. 600 مىڭعا جۋىق وتانداسىمىز ۇرىس دالاسىندا ماڭگى قالدى. 500 جەرلەسىمىز كەڭەس وداعىنىڭ باتىرى اتاعىن الدى.

«دەگەنمەن، ءارتۇرلى سەبەپتەرمەن لايىقتى ماراپاتقا يە بولماعان، «ۇمىت قالعان قاھارماندار» بار. ولار تۋرالى ارحيۆتىك مالىمەتتەردى عالىم جانە قوعام قايراتكەرى بەرىك ءابدىعالي ۇلى جيناقتاپ، 2019-جىلى Nur Otan پارتياسىنىڭ قولداۋىمەن جارىققا شىعاردى»، - دەيدى سەنات سپيكەرى.

«ۇمىتىلعان قاھارماندار - زابىتىە گەروي» كىتابىندا كەڭەس وداعىنىڭ باتىرى اتاعىنا ۇسىنىلعان، ءبىراق الا الماعان 133 قازاقستاندىقتىڭ تاريحى مەن مۇراعاتتىق قۇجاتتارى جيناقتالعان.

وسى «ۇمىتىلعان قاھارمانداردىڭ» التاۋى ەكى رەت ۇسىنىلعان. ال، شىعىس قازاقستان وبلىسى زىريان قالاسىنىڭ تۋماسى الەكساندر نەسميانوۆ ءۇش رەت ۇسىنىلىپ، ۇشەۋىندە دە ەلەۋسىز قالعان. وسى داڭقتى باتىرلاردىڭ ەسىمدەرى جانە ولاردىڭ ەرلىكتەرى قازاقستاندىقتاردىڭ كوپشىلىگىنە تانىس ەمەس»، - دەپ جازادى ماۋلەن اشىمبايەۆ.

جەڭىس كۇنى قارساڭىندا ءۇش «ۇمىتىلعان قاھارمانعا» قاتىستى تاريحي ادىلدىك ورنادى.

ەل پرەزيدەنتى قاسىم-جومارت كەمەل ۇلى توقايەۆتىڭ جارلىعىمەن 1941-1945-جىلدارداعى ۇلى وتان سوعىسىندا كورسەتكەن ەرلىگى مەن باتىرلىعى ءۇشىن «حالىق قاھارمانى» اتاعى مەرگەندەر تولەۋعالي ابدىبەكوۆكە، ىبىرايىم سۇلەيمەنوۆكە جانە اتقىشتار باتالونىنىڭ كومانديرى الەكساندر نەسميانوۆقا قايتىس بولعاننان كەيىن بەرىلدى.

«ءبىز جەڭىس كۇنىن باتىرلاردىڭ قۇرمەتى ءۇشىن اتاپ وتەمىز. سونىمەن قاتار، ميلليونداعان قۇربانداردى، سوعىستان زارداپ شەككەندەردى قايعىرا ەسكە الامىز. بۇل كۇن جەڭىستىڭ قانداي جولمەن كەلگەنىن ەستە ساقتاۋ ءۇشىن قاجەت. بۇل كۇن بەيبىتشىلىك پەن تۇراقتىلىقتىڭ قۇندىلىعىن سەزىنۋ ءۇشىن ماڭىزدى»، - دەپ تۇيىندەيدى ماۋلەن اشىمبايەۆ.