وزبەكستاندا ساياحاتشى شىعىنى وتەلەدى

ەندى ىشكى تۋريزمگە جۇمسالعان شىعىننىڭ ءبىر بولىگى سۋبسيديالانادى. ۇشاق، تەمىرجول جانە اۆتوموبيل بيلەتتەرى مەن قوناق ءۇي اقىسىنىڭ كەمى 15 پروتسەنتى وتەلەدى. مۇنداي شارا پرەزيدەنت پارمەنىمەن ورىندالىپ وتىر. ماقسات - ەل ازاماتتارىن كيەلى جەرلەرگە ءجيى ساياحات جاساۋىنا ىنتالاندىرۋ. جەڭىلدىك شەتەلدىكتەرگە قولدانىلمايدى. تەك سول ەلدىڭ ازاماتتارى يە بولادى.

وزبەكستان تۋريزم سالاسىنان جىل سايىن 1 جارىم ميلليارد دوللار پايدا تابادى. بيىل العاشقى توقساندا وزگە مەملەكەتتەردەن 600 مىڭ ساياحاتشى بارعان.

«ءار قايسىسى ەل قازىناسىنا ورتا ەسەپپەن 500 دوللاردان پايدا اكەلەدى»، - دەيدى ساراپشىلار.

ابرورقوجا مۋناۆاروۆ، تۋريزم مينيسترلىگى ينۆەستيتسيا باسقارماسى باسشىسىنىڭ ورىنباسارى:

- ارنايى پلاتفورما ازىرلەنەدى. سالىق ورگاندارىمەن ۇيلەسىمدى جۇمىس ىستەيدى. ساياحاتشى جۇرگەن جەرىندە تۇبىرتەك تالاپ ەتىپ، ونىڭ كيۋار كودىن جۇيەگە جۇكتەپ وتىرادى. ماسەلەن، اۋە بيلەتىنەن 150 مىڭ سوم قايتارىلادى. كونسەرت، گالەريا، سيرك سەكىلدى ورىنداردا بيلەتتىڭ 50 پروتسەنتى وتەلەدى.