سەنتركرەديت بانكى الفا- بانك قازاقستاننىڭ اكسيالارىن تولىق ساتىپ الدى

بانك قاجەتتى تىركەۋدىڭ بارىنەن وتكەننەن كەيىن ECO BANK برەندىمەن جۇمىس ىستەيدى. تولىق اتاۋى - «ECO BANK» ەنشىلەس بانكى» اكسيونەرلىك قوعامى. «بانكسەنتركرەديتتىڭ» رەسمي سايتىندا «الفا- بانك قازاقستان» ەنشىلەس بانكىنىڭ» كليەنتتەرى ءۇشىن بانك ونىمدەرىنىڭ بارلىق شارتى بۇرىنعى قالپىندا قالاتىنى ايتىلعان.

«SDN تىزىمىنەن شىعارۋ پروتسەدۋراسى اياقتالعاننان كەيىن بانك قىزمەتتەرىنىڭ بارلىق تىزبەسى قولجەتىمدى بولادى. بۇدان بىلاي ءبىزدىڭ كليەنتتەرىمىزگە اينالعان تۇلعالارعا قولايلى بولۋى ءۇشىن BCC. KZ ۆەب- سايتىندا سۇراق- جاۋاپ فورماتىندا ەستەلىك اقپاراتتار جاريالاندى. قوسىمشا سۇراقتار تۋىنداعان جاعدايدا جەكە تۇلعالار 505 نومىرىنە، زاڭدى تۇلعالار 605 نومىرىنە حابارلاسا الادى»، - دەپ جازىلعان بانكتىڭ مالىمەتىندە.

سايتتاعى مالىمەتكە سەنسەك، «الفا- بانك قازاقستاندى» ساتىپ الۋعا «بانك سەنتركرەديتتىڭ» ءوز قاراجاتى جۇمسالعان.

«قازىرگى تاڭدا بانكتىڭ رەبرەندينگ جۇمىستارى باستالىپ كەتتى. ياعني، ەنشىلەس بانكتەن قازاقستاننىڭ قارجى نارىعىندا 33 جىلدان بەرى جۇمىس ىستەپ كەلە جاتقان «بانك سەنتركرەديت» سياقتى تۇتاستاي قازاقستاندىق بانككە اينالادى»، - دەپ جازادى بانكتىڭ سايتى.

«بانك سەنتركرەديت» ا ق باسقارما ءتوراعاسى عالىم حۇساينوۆ سانكسيا تۇسكەن بانكتى ساتىپ الۋ تاجىريبەسى قازاقستاندا العاش رەت بولىپ جاتقانىن ايتادى.

«قىسقا مەرزىمدە وسى كەلىسىمدى ءساتتى اياقتاعانى ءۇشىن بۇكىل قاتىسۋشىلارعا العىس ايتامىن. ءبىز ءۇشىن كليەنتتەر تاراپىنان ءتۇسىپ جاتقان ماسەلەلەردى شەشۋ باستى باعىت بولماق. سونداي- اق، ءبىز قىزمەتكەرلەردىڭ ءبىر كوماندا بولىپ جۇمىلىپ، جاڭا بانكتىڭ بيزنەس- پروتسەستەرىنە اتسالىسۋىن قامتاماسىز ەتۋىمىز كەرەك. مۇنىڭ ءبارى كەلەشەكتە ۇزاق مەرزىمدى ءارى سەرىكتەستىك قاتىناس ورناتۋعا نيەتتى كليەنتتەرىمىزگە ارنالعان جاڭا ءارى قاراپايىم ونىمدەردى ىسكە قوسىپ، بانكتىڭ جاعدايىن جەتىلدىرۋگە جول اشادى»، - دەيدى بانك باسشىسى.

بۇعان دەيىن قارجى اگەنتتىگى قازاقستاندىق بانكتىڭ الفا بانك مارتەبەسىن يەلەنۋىنە كەلىسىم بەرگەن ەدى.

اۆتور: ەسىمجان ناقتىباي