كونستيتۋتسياداعى وزگەرىستەر حالىقپەن اقىلداسىپ ەنگىزىلىپ جاتىر - سەنات ءتوراعاسى

نۇر-سۇلتان. قازاقپارات - كونستيتۋتسياعا تولىقتىرۋ مەن وزگەرىستەر ازاماتتىق قوعامنىڭ پىكىرىن ەسكەرە وتىرىپ ەنگىزىلىپ وتىر.
None
None

بۇل تۋرالى سەنات ءتوراعاسى ماۋلەن اشىمبايەۆ ءمالىم ەتتى، دەپ حابارلايدى قازاقپارات ءتىلشىسى.

بۇگىن سەناتتىڭ جالپى وتىرىسىنان كەيىن تىلشىلەر سەنات ءتوراعاسىنان «كونستيتۋتسياعا تۇزەتۋ ەنگىزۋ جيىلەپ كەتپەدى مە؟» دەپ سۇرادى.

وسى ورايدا تۇزەتۋلەرگە ليميت ەنگىزۋ قانشالىقتى دۇرىس بولاتىنى تۋرالى ساۋال قويىلدى.

«ءبىزدىڭ كونستيتۋتسيا ۇنەمى تۇزەتۋلەر ەنگىزىلەتىن قۇجاتقا اينالدى دەگەن پىكىرمەن كەلىسپەيمىن. مەنىڭ ويىمشا، اتا زاڭعا وزگەرىستەردى وتە سيرەك ەنگىزەمىز. 1995-جىلى كونستيتۋتسيا قابىلداندى. سوندىقتان وسى جىلدارى سونشالىقتى كوپ تۇزەتۋ بولمادى. جالپى، وسى جولعى جاعداي ەرەكشە دەپ سانايمىن. ءبىز اتالعان ماسەلەنى رەسپۋبليكالىق رەفەرەندۋمعا ەنگىزىپ جاتىرمىز. بۇل رەتتە حالىق داۋىس بەرىپ، ءوز ۇستانىمىن ايقىندايدى. ياعني، وسى تاقىرىپتا دەپۋتاتتار نەگىزگى پوزيتسيالار مەن نورمالار بويىنشا شەشىم شىعارىپ جاتقان جوق. قازاقستان حالقى قانداي شەشىم جاساسا، الداعى ۋاقىتتا سول باعىتتى تاڭدايمىز»، - دەدى م. اشىمبايەۆ.

سونىمەن قاتار ول كونستيتۋتسياعا تۇزەتۋدى ءجيى ەنگىزۋ دۇرىس ەمەس ەكەنىن اتاپ ءوتتى.

«جالپى، كونستيتۋتسياعا تولىقتىرۋلار جۇمىس توبىنىڭ ۇسىنىسى بويىنشا ەنگىزىلدى. جۇمىس توبىنىڭ قۇرامىنا ساراپشىلار مەن عالىمدار ەندى. وسى ورايدا ەلىمىزدەگى ماماندار مەن حالىقتىڭ ۇسىنىستارى ەسكەرىلدى. مەنىڭ ويىمشا، كونستيتۋتسياعا وزگەرىستەر جاريا تۇردە ەنگىزىلىپ جاتىر، ياعني حالىقتىڭ پىكىرى نازارعا الىندى. بۇل تۇزەتۋلەر ەلىمىزدە دەموكراتيالىق پروتسەستەردى نىعايتۋ مەن دامىتۋعا ىقپال ەتەدى»، - دەدى سەنات سپيكەرى.

بۇدان بۇرىن حابارلانعانداي، بۇگىن سەناتتىڭ جالپى وتىرىسىندا «رەسپۋبليكالىق رەفەرەندۋم تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋ ەنگىزۋ تۋرالى» كونستيتۋتسيالىق زاڭ جوباسى قارالدى. قۇجاتقا تۇزەتۋ ەنگىزىلگەندىكتەن زاڭ جوباسى ماجىلىسكە قايتارىلدى.

سەناتورلار «رەفەرەندۋم تۋرالى» زاڭنان ەلباسى تۋرالى نورمانى الىپ تاستادى.

سوڭعى جاڭالىقتار