قارىزدى كوبەيتە بەرمەي، قولدا بار قارجىنى دۇرىس پايدالانۋ قاجەت - اشىمبايەۆ

«قازىر ءبارىمىز «جاڭا قازاقستاندى» قۇرۋعا بەلسەندى كىرىسىپ جاتىرمىز. بۇل جولدا بارلىق سالادا جاڭا قادام، تىڭ كوزقاراس قاجەت ەكەنى انىق. سونىڭ ىشىندە رەسپۋبليكالىق بيۋجەتتى قالىپتاستىرۋدا دا جاڭا تاسىلدەر كەرەك دەپ ەسەپتەيمىز. پرەزيدەنتىمىز ايتقانداي، جاڭا قازاقستان دەگەنىمىز - ەڭ الدىمەن ادىلەتتى قازاقستان. سول سەبەپتى بيۋدجەتتى قالىپتاستىرۋ اشىق، ءادىل، ءتيىمدى جۇرگىزىلۋگە ءتيىس. بۇل - حالىقتىڭ تالابى جانە مەملەكەت باسشىسىنىڭ بىزگە جۇكتەپ وتىرعان باستى مىندەتى»، - دەدى م. اشىمبايەۆ سەناتتىڭ بۇگىنگى وتىرىسىندا.
وسى رەتتە بولىنەتىن قارجىنىڭ جانە جوسپارلانعان جۇمىستىڭ ناقتى ناتيجە بەرۋى ماڭىزدى.
«رەسپۋبليكالىق بيۋجەتتىڭ ءار تەڭگەسى ورنىمەن ءبولىنىپ، ءتيىمدى جۇمسالۋعا ءتيىس. ۇلتتىق قوردىڭ دا قارجىسىن دۇرىس پايدالانعان ءجون. بيۋدجەت دەفيتسيتىن سىرتتان قارىز الىپ قارجىلاندىرۋ ماسەلەسىن دە پىسىقتاعان ابزال. قارىزدى كوبەيتە بەرمەي، بار قاراجاتتى دۇرىس پايدالانۋ قاجەت. سوندىقتان بيۋجەتتى قاراعان كەزدە ناتيجە بەرمەيتىن ناۋقاندىق شارالاردى قارجىلاندىرۋعا جول بەرىلمەۋى كەرەك. بۇل ماسەلەنى دەپۋتتار باقىلاۋدا ۇستايتىن بولادى. قازىر بۇكىل الەم تىعىرىققا تىرەلىپ تۇر. مۇنداي ساتتە بار قارجىنى وڭدى-سولدى شاشا بەرمەي، رەسپۋبليكالىق بيۋجەتتىڭ تيىمدىلىگىن ارتتىرۋىمىز كەرەك. ۇكىمەت مۇشەلەرىنەن، اكىمدەر مەن باسقا دا لاۋازىمدى تۇلعالاردان الداعى ۋاقىتتا وسى ماسەلەلەردى ەسكەرۋدى سۇرايمىز»، - دەدى سەنات ءتوراعاسى.
ايتا كەتەيىك، بۇگىن سەنات وتىرىسىندا دەپۋتاتتار «قازاقستان رەسپۋبليكاسىنىڭ ۇلتتىق قورىنان 2022-2024-جىلدارعا ارنالعان كەپىلدەندىرىلگەن ترانسفەرت تۋرالى» ق ر زاڭىنا وزگەرىس ەنگىزۋ تۋرالى» جانە «2022-2024-جىلدارعا ارنالعان رەسپۋبليكالىق بيۋجەت تۋرالى» ق ر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭداردى قاراپ، ماقۇلدادى.
بۇل تۇزەتۋلەر اياسىندا ءساۋىر ايىنان باستاپ زەينەتاقى مەن الەۋمەتتىك تولەمدەر قوسىمشا 4 پايىزعا ارتادى.
جالپى زەينەتاقىنىڭ ورتاشا مولشەرى وتكەن جىلمەن سالىستىرعاندا 11 پايىزعا وسەدى.