كىشى ارالعا جينالعان سۋ قۇمعا كەتۋى مۇمكىن - سەنات ءتوراعاسى

نۇر-سۇلتان. قازاقپارات - سەنات ءتوراعاسى ماۋلەن اشىمبايەۆ قىزىلورداداعى كوكارال سۋ بوگەتىنىڭ جاي-كۇيى ماسەلەسىن كوتەردى، دەپ حابارلايدى قازاقپارات ءتىلشىسى.
None
None

سپيكەر وسىدان 5 جىل بۇرىن بوگەتتىڭ ءبىر بولىگىن سۋ شايىپ كەتكەنىن، سونىڭ سالدارىنان بۇلىنگەن ۋچاسكەنىڭ كولەمى 200 مەترگە جەتكەنىن ايتتى.

«وسىدان ەكى اپتا بۇرىن ءبىزدىڭ دەپۋتاتتار ارال قالاسىندا وزبەكستاندىق سەناتورلارمەن كەزدەسىپ، ارالدى قالپىنا كەلتىرۋ ماسەلەسىن جان-جاقتى تالقىلادى. سوندا دەپۋتاتتار كوكارال بوگەتىنە ارنايى بارىپ، ونىڭ جاعدايىن ءوز كوزدەرىمەن كوردى. جالپى، كوكارال - كىشى ارالداعى سۋدى ۇلكەن ارالعا جىبەرمەي ساقتاپ تۇرۋعا ارنالعان ستراتەگيالىق ماڭىزى بار نىسان. ەگەر وسى بوگەت شايىلىپ كەتسە، وسىنشا جىل كىشى ارالعا جيناعان سۋىمىز قۇمعا ءسىڭىپ كەتەدى. وعان قانشاما قارجى ءبولىندى، دۇنيەجۇزىلىك بانكتىڭ كومەگىن دە الدىق، ۇكىمەت تە قارجى ءبولدى. سول سۋعا تۇتاس ءوڭىردىڭ حالقى قاراپ وتىر. ەگەر سۋ دەڭگەيى تومەندەپ كەتسە، ۇلكەن الەۋمەتتىك، ەكونوميكالىق، ەكولوگيالىق سالدارى بولاتىنى بەلگىلى. اشىعىن ايتساق، ۇلكەن اپات بولادى. ءبىراق ونى جوندەۋ جۇمىستارىنا قاتىستى نەمقۇرايلىق ءبىزدى الاڭداتىپ وتىر. سوندىقتان بوگەتتى كۇردەلى جوندەۋ جۇمىستارىن دەرەۋ باستاعان ءجون»، - دەدى ماۋلەن اشىمبايەۆ.

سەنات ءتوراعاسىنىڭ ايتۋىنشا، قازىر قىزىلوردا وبلىسىنىڭ اكىمدىگى بوگەتتى جوندەۋگە قاتىستى قۇجاتتاردى ازىرلەگەن. سوعان سايكەس اتالعان جۇمىسقا جالپى 5 ميلليارد تەڭگەگە جۋىق قاراجات كەرەك. ال جوندەۋ جۇمىستارىن بيىل باستاۋ ءۇشىن 500 ميلليون تەڭگە قاراجات قاجەت.

ماۋلەن اشىمبايەۆ قارجى مينيسترلىگىنە جانە ەكولوگيا، گەولوگيا جانە تابيعي رەسۋرستار مينيسترلىگىنە وسى ماسەلەگە نازار اۋدارىپ، بيىلعا ءتيىستى قاراجاتتى ءبولۋ مۇمكىندىگىن قاراستىرۋ قاجەت ەكەنىن جەتكىزدى.

ال، قاراجاتتىڭ نەگىزگى بولىگىن كۇزدە 2023-جىلعى بيۋجەتكە ەنگىزۋدى ۇسىندى.

ايتا كەتەيىك، بۇگىن سەنات وتىرىسىندا دەپۋتاتتار «قازاقستان رەسپۋبليكاسىنىڭ ۇلتتىق قورىنان 2022-2024-جىلدارعا ارنالعان كەپىلدەندىرىلگەن ترانسفەرت تۋرالى» زاڭىنا وزگەرىس ەنگىزۋ تۋرالى» جانە «2022-2024-جىلدارعا ارنالعان رەسپۋبليكالىق بيۋجەت تۋرالى» زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭداردى قاراپ، قابىلدادى.


سوڭعى جاڭالىقتار