قازاقستاندىقتار جەكە كۋالىك سۋرەتىنە وزدەرى ءتۇسىپ، ۇناعانىن تاڭداي الادى

نۇر-سۇلتان. قازاقپارات - ەندىگى ۋاقىتتا قازاقستاندىقتار تەرمينالدىڭ كومەگىمەن جەكە كۋالىك جانە ءتولقۇجات فوتوسىنا وزدەرى ءتۇسىپ، ۇناعان سۋرەتتى تاڭداي الادى.

بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ باسقارما ءتوراعاسى سۇيەنىش ءابدىلدين ءمالىم ەتتى، دەپ حابارلايدى قازاقپارات ءتىلشىسى.

«بۇگىندە ازاماتتاردىڭ 80 پايىزى حالىققا قىزمەت كورسەتۋ ورتالىقتارىندا 10 قىزمەت بويىنشا ءجيى جۇگىنەدى. ونىڭ بەسەۋى ىشكى ىستەر مينيسترلىگى سالاسىنا قاتىستى. ءبىزدىڭ ماقسات - قىزمەتتەردى اۆتوماتتاندىرۋ، ال ونلاين قولجەتىمدى قىزمەت تۇرلەرىن ودان ءارى جەتىلدىرە ءتۇسۋ. جىل ساناپ حالىققا قىزمەت كورسەتۋ ورتالىعىنا كەلەتىن كليەنتتەردىڭ سانى ازايىپ كەلەدى. حالىق قىزمەتتىڭ كوبىسىن ونلاين الىپ جاتىر. بيىلعى جىلدىڭ ءبىرىنشى توقسانىن الساق، وتكەن جىلمەن سالىستىرعاندا 10 پايىزعا ازايعان»، - دەدى سۇيەنىش ءابدىلدين ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، وتكەن جىلى ح ق ك و ارقىلى 2,4 ميلليون قازاقستاندىق جەكە كۋالىك جانە ءتولقۇجات العان.

«ءبىزدىڭ تاراپىمىزعا حالىقتان جەكە قۇجاتتاعى فوتونىڭ ساپاسىنا قاتىستى شاعىمدار ءتۇسىپ جاتادى. وسى ورايدا ءبىز ىشكى ىستەر مينيسترلىگىمەن بىرلەسىپ وزىنە قىزمەت كورسەتۋ تەرمينالىن ەنگىزىپ جاتىرمىز. مينيسترلىك اتالعان باستامانى قولداپ وتىر. تەرمينال بيومەتريالىق جانە ينتەرفەيس جۇيەسىمەن قامتىلعان. كليەنت سۋرەتكە ءوزى ءتۇسىپ، قالاعان فوتونى تاڭداي الادى. ودان ءارى ورتالىق قىزمەتكەرىنە ءوتىنىشىن بەرەدى. ءقازىر وسى ماسەلەگە قاتىستى بىرلەسكەن بۇيرىق شىعارۋ قارالىپ جاتىر»، - دەيدى ول. جاڭا قىزمەت ءتۇرى تاياۋدا نۇر-سۇلتان قالاسىندا ىسكە قوسىلماق.

اۆتور: ءالي يبرايەۆ