ەلوردادا ۇلى دالا ۇلاندارى اتتى كورمە اشىلدى - فوتو

كورمە «قازاقستان جولى» جوباسىنىڭ اياسىندا ۇيىمداستىرىلدى. ەكسپوزيتسيادا ۇلى دالا باتىرلارى ينستيتۋتىنان باستاۋ العان قازاق ساربازدارىنىڭ جاۋىنگەرلىك ەرلىكتەرىنىڭ كوپ عاسىرلىق تاريحىن بەينەلەيتىن تاريحي، مادەني ارتەفاكتىلەر ۇسىنىلعان. تاريحي جادتى ساقتاۋ، ونىڭ مۇراسىن قازاقستاندىقتاردىڭ جاس، بولاشاق ۇرپاقتارىنىڭ زەردەسىندە قايتا جاڭعىرتۋ - ەكسپوزيتسيانىڭ باستى مىندەتتەرىنىڭ ءبىرى.
«1992 -جىلعى 7-مامىردا قازاقستاننىڭ تۇڭعىش پرەزيدەنتى نۇرسۇلتان نازاربايەۆ «قازاقستان رەسپۋبليكاسىنىڭ قارۋلى كۇشتەرىن قۇرۋ تۋرالى» جارلىققا قول قويدى. مەملەكەت باسشىسى قاسىم- جومارت توقايەۆ اتاپ وتكەندەي، بۇل ۋاقىتتىڭ ىشىندە ءبىزدىڭ اسكەر تولىقتاي قالىپتاسىپ، مەملەكەت تاۋەلسىزدىگى مەن تۇتاستىعىنىڭ تىرەگى مەن باستى كەپىلىنە اينالدى. قازىر ءبىز كۋا بولىپ وتىرعان جاھاندىق احۋال مەن گەوستراتەگيالىق تۇراقسىزدىق تۇسىندا اسكەردىڭ ءرولى ارتىپ كەلەدى. سوندىقتان مەملەكەت باسشىسىنىڭ تاپسىرماسىمەن بۇگىندە قازاقستان قارۋلى كۇشتەرىن ودان ءارى جاڭعىرتۋ مەن قايتا جاراقتاندىرۋعا باعىتتالعان اۋقىمدى رەفورما باستالدى»، - دەپ ەلباسى كىتاپحاناسىنىڭ ديرەكتورى باقىتجان تەمىربولات كورمەنى اشتى.
كىتاپحانا جيناعىنىڭ ماتەريالدارى اسكەري قاۋىپسىزدىك سالاسىنداعى تاريحي مۇرانى قايتا جاڭعىرتىپ، قازىرگى زامانعى قارۋلى كۇشتەردى قۇرۋ پريزماسىن، كەشەگى جانە بۇگىنگى باتىرلاردىڭ ەرلىكتەرى ارقىلى قازىرگى قازاقستاندىق مەملەكەتتىلىكتىڭ رەتروسپەكتيۆتى كورىنىسىن قالىپتاستىرادى.
«قازاقستان رەسپۋبليكاسى تۇڭعىش پرەزيدەنتى - ەلباسى كىتاپحاناسىنىڭ باسشىلىعى مەن ۇجىمىنا ۇلى وتان سوعىسى قاھارماندارىنىڭ ءومىربايانى مەن قارۋلى كۇشتەردىڭ تاريحىن دارىپتەيتىنى ءۇشىن العىس ايتامىن. وسىنداي ءىس- شارالاردىڭ ارقاسىندا ءبىز جاستاردىڭ بويىندا وتانسۇيگىشتىك سەزىمىن وياتۋعا مۇمكىندىك الدىق»، - دەدى حالىق قاھارمانى، قازاقستان رەسپۋبليكاسى قارۋلى كۇشتەرىنىڭ گەنەرال- لەيتەنانتى باقىتجان ەرتايەۆ.