گولوۆكيننىڭ ەندى مىندەتتى قارسىلاستارى كىم بولادى؟

نۇر-سۇلتان. قازاقپارات - 9- ساۋىردە قازاقستاندىق بوكسشى گەننادي گولوۆكين IBF جانە WBA Super تۇجىرىمدارى بويىنشا ورتا سالماقتاعى الەم چەمپيونى اتاندى، دەپ حابارلايدى Prosports.kz.

سايتامادا (جاپونيا) گولوۆكين WBA Super جانە IBF تيتۋلدارى ءۇشىن جەكپە-جەكتە جاپونيالىق ريوتا مۋراتانى (16-3، 13 ك و) نوكاۋتقا تۇسىرگەن بولاتىن.

دۇنيەجۇزىلىك بوكس قاۋىمداستىعىنىڭ جاڭارتىلعان رەيتينگىندە گولوۆكين رەسمي تۇردە ۇيىمنىڭ «سۋپەرچەمپيونى» اتاندى.

الايدا، تيتۋلدارعا يە بولعان سوڭ ول بەلبەۋلەرىن مىندەتتى جانە ەرىكتى تۇردە قورعايدى. سونىمەن، GGG ءدىڭ تيتۋلىنا ەكى نەگىزگى ۇمىتكەر بار: WBA بەلبەۋىنىڭ يەگەرى كۋبالىق ەريسلاندي لارا جانە رەيتينگتىڭ ءبىرىنشى ءنومىرى، ۇلى بريتانيالىق بوكسشى كىشى كريس يۋبەنك.

لارا تيتۋلىن 29- مامىردا نيۋ-يوركتە قورعايتىنى بەلگىلى - ول يرلانديالىق گەري و'سالليۆانعا قارسى جۇدىرىقتاسادى.

يۋبەنكتىڭ ازىرگە جوسپارلانعان جەكپە-جەگى جوق، ءبىراق GGG گە قارسى رينگكە شىققىسى كەلەتىنىن بىرنەشە رەت بىلدىرگەن.