الماتىدا عاسىر جاساعان مايدانگەرگە قۇرمەت كورسەتىلدى

الماتىدا ۇلتتىق ۇلاننىڭ اسكەري قىزمەتشىلەرى قايىرلى جوڭقابايەۆتى كەلە جاتقان جەڭىس كۇنى مەرەكەسىمەن قۇتتىقتادى.
سونىمەن بىرگە ق ر ۇلتتىق ۇلانى «وڭتۇستىك» وڭىرلىك قولباسشىلىعى قولباسشىسىنىڭ ورىنباسارى پولكوۆنيك نيازتاي الكەشيەۆ مايدانگەرگە العىس حات تابىستاپ، «ق ر قۇقىقتىق ءتارتىپ اسكەرىنە 30 جىل» مەرەكەلىك مەدالىمەن ماراپاتتادى.
وسىدان سوڭ ارداگەر ءۇيىنىڭ اۋلاسىندا ۇلتتىق ۇلاننىڭ 5571 اسكەري ءبولىمىنىڭ وركەسترى سوعىس جىلدارىنداعى اسكەري اندەردى ورىنداسا، جاس ساربازدار سالتاناتتى مارشپەن ءجۇرىپ ءوتتى.
«بۇگىن ءبىز ەكىنشى دۇنيەجۇزىلىك سوعىس ارداگەرى قايىرلى ۋاتاي ۇلىن جەڭىس كۇنىنىڭ 77 جىلدىعىمەن قۇتتىقتاپ، ونىڭ باتاسىن الايىق دەپ كەلدىك. بيىل ارداگەر 101 جاسقا تولادى. جالپى، «وڭتۇستىك» وڭىرلىك قولباسشىلىعىندا بۇگىندە كوزى ءتىرى سوعىس ارداگەرلەرى قالعان جوق. ەكى تىل ارداگەرى بار. ولاردى دا قۇتتىقتاپ، ۇيلەرىنە بارامىز. بىزدەن بولەك، قاريالارعا ارداگەرلەر كەڭەسى دە وزدەرىنىڭ سىي-سياپاتتارىن كورسەتتى»، - دەدى نيازتاي الكەشيەۆ.
ءوز كەزەگىندە مايدانگەر قايىرلى جونقابايەۆ ساربازدارعا اق باتاسىن بەردى.
«دەندەرىڭ ساۋ، ءومىر جاستارىڭ ۇزاق بولسىن! اسكەري بورىشتى وتەۋ وڭاي ەمەس. دەگەنمەن، كومانديردىڭ ءتىلىن الىپ، اسكەري بورىشتى جاقسى ورىنداڭدار. ەلىمىزدە تىنىشتىق، اماندىق، بەرەكە بولسىن! ماعان كەلىپ، قۇتتىقتاعاندارىڭ ءۇشىن كوپ راحمەت!»، - دەدى اقساقال.
قايىرلى جوڭقابايەۆتىڭ ۇلى ەركىن جوڭقابايەۆ اكەسى وتاندى ءسۇيۋ تۋرالى ءجيى ايتاتىنىن جەتكىزدى.
«اكەمىز پانفيلوۆ ديۆيزياسىنىڭ سوڭعى جاۋىنگەرى. ءبىز ونى ماقتان تۇتامىز. ول ءبىزدى ءارقاشان ادال بولۋعا، ەڭبەك سۇيگىش، وتان سۇيگىش بولۋعا تاربيەلەدى. بۇگىندە ونىڭ بەس بالاسى، ون نەمەرەسى مەن ون بەس شوبەرەسى بار. ول بىزگە سوعىس وڭاي بولماعانىن، ەكى ادامعا ءبىر ۆينتوۆكا بەرىلگەنىن ايتاتىن. اكەمىز وعان شىداماي، جولداسىمەن بىرگە قولدارىنا پۋلەمەت الىپ، مايداننىڭ العى شەبىندە جاۋمەن شايقاسقان. سونداي-اق اكەمىز قان مايداندا جولداستارىڭنان ايىرىلعان وتە اۋىر بولاتىنىن ايتتى»، - دەدى ەركىن جوڭقابايەۆ.
مايدانگەردىڭ نەمەرەسى نۇرلان حاسەنبايەۆتىڭ سوزىنشە، اتاسى سوعىس تۋرالى كوپ اڭگىمەلەۋدى ۇناتپايدى.
«جالپى ول كەزدە قيىن بولدى عوي. اتامىزعا دا وڭاي بولماعانى انىق. سول سەبەپتى دە ول نەمەرەلەرىنە سول ءبىر جىلدار تۋرالى ايتقىسى كەلمەيتىن شىعار. ءبىز ونىڭ سول ۋاقىتتا ءوز وتانىن، وتباسىن قورعاپ، وتان الدىنداعى بورىشىن ادال ورىنداعانىن جاقسى تۇسىنەمىز»، - دەدى نۇرلان حاسەنبايەۆ.
ايتا كەتەيىك، ەكىنشى دۇنيەجۇزىلىك سوعىس ارداگەرى جوڭقابايەۆ قايىرلى ۋاتاي ۇلى 1921-جىلى 10- قىركۇيەكتە شىعىس قازاقستان وبلىسى، سامار اۋدانىندا دۇنيەگە كەلگەن. ەڭبەك جولىن 1940-جىلى ش ق و قۇلجا ورتا مەكتەبىندە مۇعالىم بولىپ باستاعان.
1941-جىلى قازان ايىندا پانفيلوۆ ديۆيزياسىنىڭ 23- گۆارديالىق پولكىنە قىزىل اسكەر جاۋىنگەرى قاتارىنا الىندى. ارداگەر سوعىسقا باسىنان اياعىنا دەيىن قاتىسقان. 8-گۆارديالىق اتقىشتار ديۆيزياسى قۇرامىندا پۋلەمەتشى بولعان، كەڭەس وداعىنىڭ باتىرى مالىك عابدۋللينمەن ءبىر روتادا شايقاسقان.
بەلارۋس، پولشا جانە ەستونيانى ازات ەتۋگە قاتىسقان. 1943-جىلى اقپاندا رجيەۆتەگى قاندى مايداندا اۋىر جارالانعان، جەڭىستى درەزدەندە قارسى الدى. سوعىستان كەيىن سامار اۋداندىق اتقارۋ كوميتەتىندە ءبولىم مەڭگەرۋشىسى بولىپ ىستەدى. ءارى قاراي اۋداندىق تۇتىنۋشىلار وداعىنىڭ جۇيەسىندە باسشىلىق لاۋازىمداردا بولعان.
1970-1983-جىلدارى الماتىداعى «وبشەپيت» جۇيەسىندە شارۋاشىلىق ەسەپتەرىنىڭ ديرەكتورى بولدى.
1983-جىلى قۇرمەت دەمالىسىنا شىقتى، بەس بالا تاربيەلەپ ءوسىردى. ەرلىكتەرى ءۇشىن «قىزىل جۇلدىز» جانە Ⅱ دارەجەلى «وتان سوعىسىنىڭ» وردەنىمەن، «ەرلىگى ءۇشىن»، «ماسكەۋدى قورعاعانى ءۇشىن» مەدالدارىمەن جانە باسقا دا كوپتەگەن مەدالدارمەن ماراپاتتالعان. 2020-جىلى قايىرلى جوڭقابايەۆ ق ر ۇلتتىق ۇلانى ۇيىمداستىرعان «ءبىز - جەڭىستىڭ مۇراگەرىمىز!» اتتى تاعزىم ەستافەتاسى ءۇشىن العىس ايتىپ، پرەزيدەنت قاسىم-جومارت توقايەۆقا حات جازعان بولاتىن. ءوز كەزەگىندە مەملەكەت باسشىسى مايدانگەرگە جىلى لەبىزى ءۇشىن العىس ءبىلدىرىپ، ۇزاق عۇمىر تىلەدى.