كەلەر جىلى اۋىلدارعا «يلون ماسكتىڭ ينتەرنەتى» كەلەدى
بۇل جايىندا ق ر سيفرلىق دامۋ، يننوۆاتسيالار جانە ايروعارىش ونەركاسىبى ءمينيسترى باعدات مۋسين ءماجىلىستىڭ باسپا ءسوز الاڭىندا ب ا ق وكىلدەرىنىڭ ساۋالدارىنا بەرگەن جاۋابىندا ءمالىم ەتتى. «ەل اراسىندا «يلون ماسكتىڭ ينتەرنەتى» دەپ اتالاتىن سپۋتنيك ينتەرنەتى نەگە قازاقستاندىقتارعا ءالى قولجەتىمسىز؟» دەپ سۇرادى جۋرناليستەر. ءمينيستردىڭ ايتۋىنشا، ول ءۇشىن اۋەلى سالىق كودەكسىنە ءتيىستى وزگەرىس ەنگىزۋ قاجەت.
«مۇنى ءبىز تومەن وربيتالى سپۋتنيك توپتارى دەپ اتايمىز. وسى تەحنولوگياعا قارجى قۇيىپ وتىرعان بىرنەشە كومپانيا بار. سونىڭ ءبىرى - OneWeb كومپانياسى. بۇل ۇيىممەن پيلوتتىق جوبانى پىسىقتاپ جاتىرمىز. ءسىز «يلون ماسكتىڭ ينتەرنەتى» دەپ وتىرعان SpaceX كومپانياسىنىڭ Starlink جوباسى دا بار. سونداي- اق، SES دەگەن ليۋكسەمبۋرگ كومپانياسى وسى تەحنولوگيا بويىنشا ينتەرنەت ۇسىنا الادى. وسى سياقتى باسقا دا كومپانيالار بار. ولار دا بۇل نارىققا كىرگىسى كەلەدى. بۇل ماسەلەدە ءبىز مونوپوليادان اۋلاق بولعىمىز كەلەدى. ياعني، قازاقستاننىڭ نارىعىن بىرنەشە وپەراتورعا اشامىز.
قازىر نەگە ينفراقۇرىلىمىن سالمايدى دەگەنگە كەلسەك، قىزمەتتىڭ مۇنداي ءتۇرى ءۇشىن سالىق مولشەرلەمەسى وتە جوعارى. ويتكەنى بۇرناعى جىلدارى سالىق كودەكسىندە راديوجيىلىكتەردىڭ سالىق مولشەرلەمەسىن بەكىتۋ كەزىندە مۇنداي تەحنولوگيالاردىڭ كەلەتىنى ەسكەرىلمەگەن بولاتىن. سوندىقتان، نورمانى دەپۋتاتتار قولداسا، بيىل ونى قابىلدايمىز»، - دەدى باعدات مۋسين.
ايتۋىنشا، قازىر اتالعان 3 وپەراتور نورمانىڭ قابىلدانۋى كۇتىپ وتىرعان كورىنەدى.
«سالىق كودەكسىنە ءتيىستى وزگەرىستى ەنگىزسەك، كەلەسى جىلدان باستاپ بۇل وپەراتورلار نارىعىمىزعا كىرىپ، قازاقستاننىڭ 4 نۇكتەسىندە ينفراقۇرىلىم ورناتا باستايدى. ولار ءبىزدىڭ ەلدىڭ اۋماعىندا جۇمىس ىستەۋى ءۇشىن جەر ۇستىندە ينفراقۇرىلىم ورناتىلۋى كەرەك. ءبىراق بۇل بۇكىل ەلگە وپتيكا تارتىلادى دەگەن ءسوز ەمەس. ءتورت بازالىق نۇكتە بولادى. سولار سپۋتنيكتەن ينتەرنەت تاراتادى»، - دەپ ءتۇسىندىردى ۆەدومستۆو باسشىسى.
سونداي- اق، باعدات مۋسين بۇعان دەيىن مۇنداي تەحنولوگيانىڭ ونىمىنە سالىق مولشەرلەمەسى بەلگىلەنبەگەنىن ايتتى. ەگەر ول مولشەرلەمە ناقتى بەكىتىلمەسە، اتالعان شەتەلدىك كومپانيالار نارىققا كەلمەۋى مۇمكىن.
«ءبىز سالىق مولشەرلەمەسىن ەنگىزبەسەك، ولار كەلمەيدى، كەلگەن كۇننىڭ وزىندە سالىق تولەمەيدى. سوندىقتان بيزنەستىڭ جاڭا ءتۇرى سالىق اكەلىپ، حالىققا قىزمەت كورسەتۋى ءۇشىن جاعداي جاسايمىز. اتالعان ءۇش وپەراتوردىڭ ەكەۋى تەستىلەۋ رەجيمىنەن ءوتتى. ال Starlink وپەراتورىن تەستىلەۋدىڭ قاجەتى جوق. ويتكەنى الەمنىڭ ءبىرقاتار ايماعىندا ءوز تەحنولوگياسىن تاراتىپ وتىر. ءبىز ول كومپانياعا زاڭناماعا وزگەرىس ەنگىزگەن سوڭ اقپارات بەرەمىز دەپ كەلىسكەنبىز. سودان كەيىن ولار قازاقستان نارىعىنا كىرۋ جۇمىسىن باستايدى. ەگەر بيىل دەپۋتاتتار وسى وزگەرىستەردى قابىلداسا، كەلەسى جىلى ينفراقۇرىلىم جۇرگىزۋ باستالادى. سوندا كەلەسى جىلدىڭ اياعىنا دەيىن حالىققا سپۋتنيك ينتەرنەتى بەرىلەدى»، - دەدى مينيستر.
اۆتور: ەسىمجان ناقتىباي
