مينيستر كوكجيدە اۋماعىندا مۇناي ءوندىرۋدى كەزەڭ- كەزەڭىمەن توقتاتۋدى ۇسىندى

نۇر- سۇلتان. قازاقپارات – ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ۇكىمەت وتىرىسىندا كوكجيدە جەراستى سۋىنىڭ لاستانۋ ماسەلەسىن كوتەردى، دەپ حابارلايدى قازاقپارات ءتىلشىسى.
None
None

«اقتوبە وبلىسىنداعى كوكجيدە جەراستى سۋىنىڭ مۇناي ونىمدەرىمەن لاستانۋى - نازار اۋدارۋدى قاجەت ەتەتىن ماڭىزدى ماسەلە بولىپ وتىر. كوكجيدە ۋلتراپرەسستى جەراستى سۋى باتىس وڭىردە بىرەگەي سانالادى جانە ونىڭ الەۋەتىن ساپالى اۋىز سۋعا تاپشى اقتوبە، اتىراۋ جانە ماڭعىستاۋ وبلىستارىنىڭ حالقىن سۋمەن قامتاماسىز ەتۋگە پايدالانۋعا بولادى»، - دەدى ەكولوگيا ءمينيسترى ۇكىمەت وتىرىسىندا.

ءمينيستردىڭ ايتۋىنشا، كوكجيدە اۋماعىندا 8 جەر قويناۋىن پايدالانۋشى كومىرسۋتەك شيكىزاتىن بارلاۋ جانە ءوندىرۋ جۇمىستارىن جۇرگىزۋدە.

«ءارتۇرلى كەزەڭدە مەملەكەتتىك ورگاندار مەن جەرگىلىكتى اتقارۋشى ورگاندار كوكجيدە اۋماعىندا جەر استى سۋلارىنىڭ مۇناي ونىمدەرىمەن لاستانۋ فاكتىلەرىن انىقتاعانىن ايتا كەتكەن ءجون. وسىعان بايلانىستى كوكجيدە سۋ قورىن قوسىمشا بارلاۋ جۇمىستارى جۇرگىزىلدى. تاۋلىگىنە 173,4 مىڭ تەكشە مەتر كولەمىندە جەراستى سۋىنىڭ قورى بەكىتىلدى جانە كوكجيدە كەن ورنىنىڭ شەكاراسى انىقتالدى. جەر قويناۋىن پايدالانۋشىلاردىڭ ۆەدومستۆولىق جەلىسىنىڭ ۇڭعىمالارى بويىنشا سىناما مەن تالداۋ الىنىپ، قوسپالاردىڭ بار ەكەندىگىن كورسەتتى. الايدا، مۇناي ونىمدەرى بويىنشا شەكتى رۇقسات ەتىلگەن كونتسەنتراتسيادان اسىپ كەتۋ فاكتىسى انىقتالماعان»، - دەدى س. برەكەشيەۆ.

جەراستى سۋىنىڭ لاستانۋىنا جول بەرمەس ءۇشىن ەكولوگيا ءمينيسترى ۇكىمەت باسشىسىنا ءوتىنىش جاسادى. اتاپ ايتقاندا كوكجيدەنىڭ شەكاراسى شەگىندە جەر قويناۋىن پايدالانۋشىلاردىڭ قىزمەتىن كەزەڭ- كەزەڭىمەن توقتاتۋ بويىنشا شارا قابىلداۋدى، ال اقتوبە وبلىسىنىڭ اكىمدىگىنە جەراستى سۋىنىڭ مونيتورينگىن كۇشەيتۋدى تاپسىرۋدى سۇرادى.

ايتا كەتەيىك، اقتوبەدەگى كوكجيدە كەن ورنىنداعى مۇناي ءوندىرۋ جۇمىسىن توقتاتىپ، تازا اۋىز سۋدى ساقتاۋ ماسەلەسى ءجيى كوتەرىلىپ ءجۇر.

اۆتور: ايجان سەرىكجان قىزى


سوڭعى جاڭالىقتار