جەڭىلدەتىلگەن اۆتونەسيە كەلەسى اپتادان باستاپ بەرىلۋى مۇمكىن – مينيستر

نۇر- سۇلتان. قازاقپارات - ۇكىمەت ۇيىندەگى بريفينگتە حالىقتى جەڭىلدەتىلگەن اۆتونەسيەلەۋ جۇمىستارى قاشان باستالاتىنى ايتىلدى، دەپ حابارلايدى قازاقپارات ءتىلشىسى.

«اۆتونەسيە شارتتارى بەكىتىلدى. تەك بەكىتىلگەننەن كەيىن زاڭ بويىنشا 10 كۇن تىركەۋدەن ءوتۋى كەرەك. ءبىزدىڭ قۇجاتتار تولىعىمەن 15 - ساۋىردە بەكىتىلگەن، تيىسىنشە ەكولوگيا مينيسترلىگى دە قۇجاتتاردى 24 - ساۋىردە بەكىتتى. ءبىراق تىركەۋدەن ءوتۋ سەكىلدى راسىمدەر شامامەن 10 كۇنگە سوزىلادى»، - دەدى ق ر ينۆەستيتسيالار جانە ينفراقۇرىلىمدىق دامۋ ءمينيسترى قايىربەك وسكەنبايەۆ ۇكىمەت ۇيىندە وتكەن باسپا ءسوز ءماسليحاتىندا.

ءمينيستردىڭ ايتۋىنشا، 6-مامىرعا دەيىن قاراجات ونەركاسىپتى دامىتۋ قورىنا اۋدارىلادى.

«بۇل - «بايتەرەك» قورىنىڭ اكسيونەرلىك قوعامى. بايتەرەك قورى، قازاقستاننىڭ ونەركاسىپتى دامىتۋ قورى ءوزى جۇمىس ىستەيتىن بانكتەرمەن شارت جاساسۋى ءتيىس. وسىدان كەيىن ولار اتالعان بانكتەردىڭ شوتىنا اقشا اۋدارۋى كەرەك جانە بانكتەر جۇمىسقا كىرىسۋى كەرەك. وعان قانشا ۋاقىت كەتەتىنىن ءار بانكپەن جەكە انىقتايمىز. ازىرگە بىرنەشە بانكپەن ۋاعدالاستىق بار. ولارمەن كەلىسىم جاسالدى، قازىر بۇل جۇمىس پىسىقتالىپ جاتىر»، - دەدى ق. وسكەنبايەۆ.

سونىمەن بىرگە، ق ر ەكولوگيا، گەولوگيا جانە سۋ رەسۋرستارى ءمينيسترى سەرىكقالي برەكەشيەۆ ۋتيليزاتسيالىق الىمنىڭ سوماسىن ازايتۋ بۇيرىعى قاشان كۇشىنە ەنەتىنىن ايتتى.

«بۇل بۇيرىق بۇكىل مەملەكەتتىك ورگاندارمەن كەلىسىلدى جانە ادىلەت مينيسترلىگىنە مەملەكەتتىك تىركەۋگە جىبەرىلدى. ادىلەت مينيسترلىگىنەن شىققان سوڭ بەلگىلى بولادى»، - دەدى سەرىكقالي برەكەشيەۆ.

ەكولوگيا مينيسترلىگى باسپا ءسوز قىزمەتىنىڭ ناقتىلاۋىنشا، ۋتيل الىمىن 50 پايىزعا دەيىن تومەندەتۋ بۇيرىعى 11- مامىردا كۇشىنە ەنەدى.

اۆتور: ايجان سەرىكجان قىزى