شىعىس قازاقستاندا ەڭ ۇزىن كوپىردىڭ قۇرىلىسى باستالدى

ماسەلەن، بيىل قىزىلسۋ وتكەلىمەن قاتىنايتىن ەسكى پارومدار بۇقتىرمانىڭ بەتىنە جىلداعىدان ەرتە شىقتى. قاجەتتى ماتەريالداردى جىلدام جەتكىزۋ ءۇشىن ايدىننىڭ بەتى مۇزدان ارشىلىپ، سۋ كولىكتەرىنە جول اشىلعان. نەگىزگى كوپىردىڭ العاشقى تىرەگى سالىندى. ءالى جۇمىس شاش ەتەكتەن. سوندىقتان نيگماتۋللا ابدۋلحاقوۆتىڭ ايتۋىنشا، ءاربىر كۇن قىمبات. جەل مەن داۋىلدى جۇمىسقا كەدەرگى سانامايتىن بولعان. ءتىپتى ەكى بەتكە قاتىناپ جۇرگەن ەسكى پارومداردى جىلداعىدان ەرتە جۇرگىزىپ، جۇمىس قارقىنىن كۇشەيتتى. ويتكەنى قۇرىلىس ماتەريالدارىنىڭ ۋاقتىلى جەتۋى ماڭىزدى. قازىر نەگىزگى كوپىردى سالۋعا ارنالعان ۋاقىتشا قۇرىلعى سالىنىپ جاتىر، ءارى قاراي بارلىق جۇمىس قاتار جۇرەدى.
نيگماتۋللا ابدۋلحاقوۆ، كوپىر قۇرىلىسىنىڭ جەتەكشىسى:
- قيىندىق جوق ەمەس، كليمات كۇردەلى. بىرەسە جەل تۇرادى، بىرەسە كۇرت سۋىتىپ كەتەدى، ءبىراق جۇمىس توقتاماۋ كەرەك. كەرى قاراي جول جوق. قايتسەك تە مەجەلى مەرزىمىندە سالىپ بىتەمىز دەگەن سەنىمدەمىز. جوبا قۇنى باستاپقىدان قىمباتتادى. اۋەلى 30 ميلليارد تەڭگەگە شامالانسا، ەندى ول 50 ميلليارد استى. ويتكەنى كوپىر قۇرامىنا 16 شاقىرىم جول قوسىلعان. ول جول قورىق ىشىمەن وتەتىندىكتەن ءتيىستى كەلىسىمدەردى جاساۋ جاعى دا ۇزاققا سوزىلعان.
بۇعان قوسا 18 جاساندى قۇرىلعى دا بوي كوتەرەدى. قازىر بۇل جەردە 100 ادام جۇمىس ىستەپ ءجۇر.
اندرەي يدروشنيكوۆ بەتون دىڭگەكتەردىڭ قۇيىلۋىن قاداعالايدى. ويتكەنى تەحنولوگيالىق تالاپ ساقتالماسا ەڭبەك ەش كەتەدى.
اندرەي يادروشنيكوۆ، مونتاجداۋشى:
- ەڭ باستىسى، بەتونعا سۋ ارالاسىپ كەتپەۋى كەرەك. سوعان كوڭىل بولەمىز. سوندىقتان بەتون ارنايى قۇبىر ارقىلى جىبەرىلەدى.
ۇزىندىعى 1300 مەترگە جەتەتىن بۇقتىرما كوپىرىنىڭ قۇرىلىسى ءارى- بەرى وتكەن جەرگىلىكتى تۇرعىنداردىڭ دا نازارىندا. «باستالماي جاتىپ توقتاپ قالاتىن جوبالاردىڭ ءبىرى بولار ما» دەپ الاڭداعان جۇرتتىڭ كۇدىگى قازىر ەپتەپ سەيىلە باستاعانداي. ەگەر قارجىلىق كەدەرگىلەرگە ۇشىراماسا، كۇرشىمدىكتەر 3 جىلدان سوڭ ورتالىققا ەلىمىزدەگى ەڭ ۇزىن كوپىرلەردىڭ ءبىرى ارقىلى قاتىنايدى. ازىرگە كۇندەرى 50 جىلدىق تاريحى بار ەسكى پارومدارعا عانا قاراپ تۇر.
www.24.kz