قاڭتار وقيعاسى كەزىندە ءبىر قاتىسۋشى تەرروريستىك اكت جاسادى - باس پروكۋراتۋرا

نۇر-سۇلتان. قازاقپارات – ق ر باس پروكۋراتۋراسى قىزىلوردا وبلىسىندا اسا اۋىر قىلمىس جاساعان قاڭتار وقيعاسىنىڭ ءبىر قاتىسۋشىسىنا قاتىستى تەرگەۋدى اياقتادى، دەپ حابارلايدى قازاقپارات ءتىلشىسى.

بۇل تۋرالى ۆەدومستۆونىڭ 1- قىزمەت باستىعىنىڭ ورىنباسارى ەلدوس قيلىمجانوۆ ءمالىم ەتتى.

«قىزىلوردا وبلىسىندا اسا اۋىر قىلمىس جاساعان قاڭتار وقيعالارىنىڭ ءبىر قاتىسۋشىسىنا قاتىستى تەرگەۋدى اياقتادىق. 5- قاڭتاردا قىزىلوردا قالاسىنداعى جاپپاي تارتىپسىزدىكتەر كەزىندە ول جانە ونىڭ سىبايلاستارى ۇلتتىق ۇلاننىڭ «كاماز» جۇرگىزۋشىسىن قاتىگەزدىكپەن ۇرىپ-سوققان. سودان كەيىن كۇدىكتى اسكەري تەحنيكانى ايداپ كەتىپ، قوزعالتقىش پەدالىنا كىرپىش قويىپ، ماشينانى اسكەريلەردىڭ قورشاۋىنا باعىتتاپ، قىلمىسكەردىڭ ءوزى «كاماز» كابيناسىنان سەكىرىپ كەتكەن، - دەدى ەلدوس قيلىمجانوۆ و ك ق وتكەن باسپا ءسوز ءماسليحاتىندا.

ونىڭ ايتۋىنشا، باسقارۋسىز قالعان «كاماز» ۇلكەن جىلدامدىقپەن كەلىپ اسكەريلەردى قاعىپ، سالدارىنان ادام قازا تاپقان.

«اۆتوماشينا ۇلكەن جىلدامدىقپەن اسكەريلەردى باسىپ، ناتيجەسىندە سولدات م. قايساروۆ قازا تاپتى. كۇدىكتىنىڭ ارەكەتى تەرروريزم اكىسىن جاساۋ بويىنشا سارالاندى. م. قايساروۆ وتباسىنداعى جالعىز بالا بولعان، وسى جىلى ول 20 جاسقا تولار ەدى»، - دەدى باس پروكۋراتۋرا وكىلى.

بۇعان دەيىن ق ر ءى ءى م تەرگەۋ دەپارتامەنتىنىڭ باسشىسى سانجار ءادىلوۆ قاڭتار وقيعاسى كەزىندە اسىرەسە ءۇش وڭىردە نىساندار قاتتى تونالعانىن ايتقان ەدى.