قوعامنىڭ بارلىق وكىلى قابىلداناتىن زاڭ جوباسىن تالقىلاۋعا قاتىسا الادى

بۇل تۋرالى ادىلەت مينيسترلىگى زاڭ جوبالاۋ قىزمەتىنىڭ ۇيلەستىرۋ باسقارماسىنىڭ باسشىسى البينا اۋباكىروۆا باياندادى، دەپ حابارلايدى قازاقپارات.
ماماننىڭ ايتۋىنشا، جوبانىڭ قوعام مەن سالاعا قاتىسى بار بىلىكتى مامانداردىڭ تالقىلاۋىنان ءوتۋى وتە ماڭىزدى.
«قانداي دا ءبىر زاڭنىڭ قاجەتتىگى تۋىنداعان جاعدايدا ول باستاما رەتىندە كوتەرىلىپ، كەيىن ءىس جۇزىندە كۇشىنە ەنگەنگە دەيىنگى ارالىقتا بىرنەشە كەزەڭنەن وتەدى. سول كەزەڭدەردىڭ ەڭ ماڭىزدىلارىنىڭ ءبىرى - زاڭعا قاجەت تۇجىرىمدامانىڭ جوباسىن ازىرلەۋ كەزەڭى. قاراپايىم تىلمەن ايتساق، زاڭ جوباسىنىڭ نە ءۇشىن قاجەت ەكەنىن، ەرتەڭ كۇشىنە ەنگەن جاعدايدا قۇقىقتىق، الەۋمەتتىك-ەكونوميكالىق تۇرعىدا اسەرى قانداي بولاتىنىن وسى تۇجىرىمداما انىقتايدى»، - دەدى باسقارما باسشىسى.
بۇل ورايدا، ەڭ ماڭىزدىسى، تۇجىرىمداما جوباسى ءازىر بولعاننان كەيىن «اشىق ن ق ا» پورتالىندا قوعامنىڭ تالقىلاۋىنا شىعارىلادى. ال زاڭ جوباسى قىزمەتى ماسەلەلەرى جونىندەگى ۆەدومستۆوارالىق كوميسسيانىڭ مۇشەلەرى 15 جۇمىس كۇنى ىشىندە تۇجىرىمداماعا قاتىستى ءوز ۇسىنىستارى مەن ەسكەرتۋلەرىن جولدايدى. ول ۇسىنىس، ەسكەرتۋلەر دە «اشىق ن ق ا» پورتالىنا شىعارىلادى.
«وسىدان كەيىن عانا تۇجىرىمداما جوباسى اتالعان كوميسسيانىڭ وتىرىستارىندا قارالادى. مۇنى ۇكىمەت جانىنداعى كونسۋلتاتيۆتىك-كەڭەس بەرۋ ورگانى دەپ تۇسىنۋگە بولادى. بۇل ورگان ءتۇرلى سالالار مەن ۆەدومستۆولار اراسىندا تۋىندايتىن ۇسىنىس-باستامالاردى ازىرلەپ، ۇيلەستىرۋ ءۇشىن قۇرىلعان. ەلدەگى زاڭنامانىڭ ۋاقىت تالابىنا ساي جەتىلە تۇسۋىنە بىردەن-ءبىر مۇددەلى ورگان دا وسى كوميسسيا. ونىڭ قۇرامىنا پارلامەنت دەپۋتاتتارى، مەملەكەتتىك ورگانداردىڭ وكىلدەرى، ۇكىمەتتىك ەمەس ۇيىمدار مەن بيزنەس قاۋىمداستىقتاردىڭ وكىلدەرى كىرەدى. ياعني، قابىلدانۋعا ۇسىنىلعان زاڭ جوباسى ومىرىنە اسەر ەتەتىن قوعام توپتارىنىڭ بارلىق وكىلدەرىنە زاڭنىڭ جوباسىن ازىرلەۋ كەزىنەن باستاپ بۇل پروتسەسكە بەلسەندى قاتىسۋعا مۇمكىندىك جاسالعان»، - دەپ ءتۇسىندىردى البينا اۋباكىروۆا.
ونىڭ مالىمەتىنشە، كوميسسيا قارالىپ جاتقان زاڭ ەرتەڭ كۇشىنە ەنگەن كەزدە ءبىر ماسەلەنى رەتتەگەنىمەن، قوسىمشا قيىندىقتار تۋعىزباۋ ءۇشىن ىقتيمال سالدارىن جان-جاقتى زەرتتەپ، تالقىلايدى.
قازىرگى تاڭدا COVID-19 پاندەمياسىنىڭ تاۋەكەلدەرىن ەسكەرىپ، كوميسسيا وتىرىستارى ونلاين-رەجيمدە وتكىزىلىپ ءجۇر.
«كوميسسيا وتىرىستارىنىڭ بولاتىنى ادىلەت مينيسترلىگىنىڭ رەسمي سايتىندا جاريالانىپ وتىرادى. بولاشاقتا زاڭ جوباسىن ازىرلەۋشى مەملەكەتتىك ورگاندار كوميسسيا وتىرىستارىنىڭ بولاتىنىن Instagram مەن Facebook ارقىلى جاريالايدى دەپ جوسپارلانىپ وتىر.
بۇل ازاماتتاردىڭ زاڭناماداعى وزگەرىستەردەن اناعۇرلىم حاباردار بولىپ وتىرۋىنا جول اشادى.
2021-جىلى كوميسسيانىڭ 41- وتىرىسى ءوتتى. سول وتىرىستاردا 58 زاڭ جوباسىنىڭ تۇجىرىمداماسى، پارلامەنت دەپۋتتاتارى باستاماشى بولعان 41 زاڭ جوباسىنا ۇكىمەتتىڭ بەرگەن قورىتىندىسى، سونداي-اق، 9 ۇكىمەت قاۋلىسى قارالدى. سونىڭ ىشىندە بىلتىر جەرگىلىكتى دەڭگەيدەگى اكىمدەردى سايلاۋ، ازاماتتىق زاڭنامانى، دەنساۋلىق ساقتاۋ سالاسىن جەتىلدىرۋ، قىلمىستىق زاڭنامانى وڭتايلاندىرۋ، الەۋمەتتىك كودەكس تۇجىرىمداماسى سياقتى ەلدىڭ نازارىندا بولعان قۇجاتتار بويىنشا وتىرىستار وتكەنىن اتاپ ءوتۋ كەرەك»، - دەدى باسقارما باسشىسى.