قازاقستاندىق بىتىمگەرلەردى دونباسقا جىبەرۋ ماسەلەسى قارالىپ جاتقان جوق – مينيسترلىك

نۇر-سۇلتان. قازاقپارات - ەلىمىزدە اسكەري بىتىمگەرلەردى دونباسقا جىبەرۋ ماسەلەسى كوتەرىلگەن ەمەس.
None
None

بۇل تۋرالى قورعانىس ءمينيسترىنىڭ ورىنباسارى، گەنەرال-لەيتەنانت سۇلتان كامالەتدينوۆ ءمالىم ەتتى، دەپ حابارلايدى قازاقپارات ءتىلشىسى.

بۇگىن ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتى بارىسىندا ءتىلشى «ەگەر ۇجىمدىق قاۋىپسىزدىك شارت تۋرالى ۇيىم (و د ك ب) دونباسقا اسكەري بىتىمگەرلەردى جىبەرۋ تۋرالى شەشىم قابىلداسا، قازاقستاندىق بىتىمگەرلەر قاتىسا ما؟»، - دەگەن ساۋال قويدى.

ءتىلشى ساۋالىنا قورعانىس ءمينيسترىنىڭ ورىنباسارى، گەنەرال-لەيتەنانت سۇلتان كامالەتدينوۆ جاۋاپ بەردى.

«گەوساياسي جاعدايعا بايلانىستى اتالعان ماسەلە بارشا قازاقستاندىقتاردى الاڭداتىپ وتىرعان سەكىلدى. ايتا كەتەتىن جايت، قازاقستاندىق قارۋلى كۇشتەردىڭ ەلدەن تىس جەردەگى شارالارعا قاتىسۋى تۋرالى الدىن الا جازىلىپ، نورماعا ساي بەكىتىلگەن. قارۋلى كۇشتەردىڭ بىتىمگەرلىك وپەراتسيالارعا قاتىسۋى تەك ب ۇ ۇ قاۋىپسىزدىك كەڭەسىنىڭ رەزوليۋتسياسى بويىنشا عانا جۇزەگە اسىرىلادى»، - دەدى سۇلتان كامالەتدينوۆ.

ونىڭ ايتۋىنشا، ب ۇ ۇ رەزوليۋتسيا جاريالاعان جاعدايدىڭ وزىندە ماسەلە الدىمەن ەل ىشىندە تالقىعا سالىنادى.

«مەملەكەت باسشىسى رەزوليۋتسيانى نەگىزگە الا وتىرىپ، ماسەلەنى پارلامەنتتىڭ الدىنا شىعارادى. ەگەر پارلامەنت بەكىتسە، وندا اسكەري بىتىمگەرلەردى قاتىستىرۋ شەشىمى قابىلدانۋى مۇمكىن. دەگەنمەن، قازىر دونباسقا اسكەري بىتىمگەرلەر جىبەرۋ ماسەلەسى قارالىپ جاتقان جوق. ەشقانداي كەلىسىم نەمەسە كەلىسسوز دە ءجۇرىپ جاتقان جوق»، - دەيدى ول.

بۇعان دەيىن ءمينيستردىڭ ورىنباسارى قازاقستاندا اسكەري پاتريوتتىق تاربيە بەرۋدىڭ جاڭا اكتىسى قابىلداناتىنىن ايتتى.

ودان بولەك، مينيسترلىك اسكەري مىندەتىن وتەگەندەردى مەملەكەتتىك ورگاندارعا جۇمىسقا ورنالاستىرماق.

سوڭعى جاڭالىقتار